ନୂଆଦିଲ୍ଲୀ: କରୋନା ଭୂତାଣୁ ଏକ ଆଞ୍ଚଳିକ ରୋଗ ଭାବେ ସୀମିତ ରହିବାକୁ ଯାଉଛି। ଆଗାମୀ ୬ମାସ ମଧ୍ୟରେ କରୋନା ଭୂତାଣୁ ଏପରିସ୍ଥିତିକୁ ଆସିବ ବୋଲି ଜାତୀୟ ରୋଗ ନିୟନ୍ତ୍ରଣ କେନ୍ଦ୍ର (ଏନସିଡିସି) ନିର୍ଦେଶକ ସୁଜିତ ସିଂହ କହିଛନ୍ତି। କରୋନା ଭୂତାଣୁ ଅନେକ ପୂର୍ବାନୁମାନକୁ ଭୁଲ୍ ପ୍ରମାଣିତ କରିଥିଲେ ମଧ୍ୟ ୬ମାସ ମଧ୍ୟରେ ଏହା ଆଞ୍ଚଳିକସ୍ଥିତିକୁ ଆସିବ। ଭାରତର ବିବିଧତା ଓ ଲୋକଙ୍କ ରୋଗ ପ୍ରତିରୋଧକ ଶକ୍ତିର ସ୍ଥିତି ଅନୁଯାୟୀ ବିଭିନ୍ନ ଅଞ୍ଚଳରେ କରୋନାର ସଂକ୍ରମଣ ଭିନ୍ନ ଭିନ୍ନ ରହିବ। ବିଭିନ୍ନ ସ୍ଥାନରେ କରୋନାର ସଂକ୍ରମଣ ହ୍ରାସ ଓ ବୃଦ୍ଧି ଲାଗି ରହିବ। ତେଣୁ ଏହା ଏକ ପ୍ରକାର ଆଞ୍ଚଳିକ ଭିତ୍ତିରେ ସୀମିତ ରହିବ। ଫଳରେ ଏହାର ସଂକ୍ରମଣ ନିୟନ୍ତ୍ରଣାଧୀନ ରହିବ ଓ ଏହାର ପ୍ରଭାବ ହ୍ରାସ ପାଇବ।ସ୍ବାସ୍ଥ୍ୟ ଭିତ୍ତିଭୂମି ଉପରେ ଏହାର ଚାପ ସେତେଟା ପଡିବ ନାହିଁ। ତେବେ ସିଂହ କହିଛନ୍ତି ଯେ ଲୋକେ କରୋନା ସତର୍କତାକୁ ସର୍ବଦା ପାଳନ କରିବା ଦରକାର। ସେ କହିଛନ୍ତି ଯେ ଟିକା ହିଁ କରୋନା ଭୂତାଣୁ ବିରୋଧରେ ଲଢେଇ ପାଇଁ ବଡ ଅସ୍ତ୍ର। ପୂର୍ବରୁ ବିଶ୍ବ ସ୍ବାସ୍ଥ୍ୟ ସଂଗଠନ ମଧ୍ୟ ଏପରି ପୂର୍ବାନୁମାନ କରିଥିଲା। ଅନ୍ୟପଟେ ତୃତୀୟ ଲହର ଆସିବା ନେଇ ଯେଉଁ ଆଶଙ୍କା କରାଯାଉଛି ତାକୁ ସିଂହ ଏକ ପ୍ରକାର ଏଡାଇ ଦେଇଛନ୍ତି। ନୂଆ ପ୍ରଜାତିର କରୋନା ଭୂତାଣୁ ଆସିଲେ ଦେଶରେ ତୃତୀୟ ଲହର ଆସିବ ବୋଲି କରାଯାଉଥିବା ଆଶଙ୍କାକୁ ସେ ଏଡାଇଛନ୍ତି। ସେ କହିଛନ୍ତି ଯେ ଗୋଟିଏ ନୂଆ ପ୍ରଜାତି ଦ୍ବାରା ତୃତୀୟ ଲହର ଆସିବା ସମ୍ଭବ ନୁହେଁ। କାରଣ ଟିକାକରଣ ଯୋଗୁଁ ସଂକ୍ରମଣର ବେଗ ହ୍ରାସ ପାଇବ।
ଇପିଏ ରୁ ବିରଞ୍ଚିନାରାୟଣ ପତ୍ରୀ ରିପୋର୍ଟ
ଇପିଏ ନିଉଜ ( ଇଷ୍ଟର୍ନ ପ୍ରେସ ଏଜେନ୍ସି )
