କିଶୋରୀ-କିଶୋର ସମାବେଶ ଉଦ୍ଯାପିତ
ଭୁବନେଶ୍ୱର : ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା କିଶୋରୀ-କିଶୋର ସମାବେଶର ଉଦ୍ଯାପନୀ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇଥିଲେ । ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ କଳିଙ୍ଗ ଷ୍ଟାଡିୟମ ଠାରେ ଆୟୋଜିତ ଏହି ଦୁଇଦିନିଆ ସମାବେଶରେ ଯୋଗଦେଇ ଉପମୁଖ୍ୟମନ୍ତ୍ରୀ ଶ୍ରୀମତୀ ପରିଡ଼ା କିଶୋର ଅବସ୍ଥାରେ ମାନସିକ ସ୍ୱାସ୍ଥ୍ୟ ଓ ସେମାନଙ୍କ ମଧ୍ୟରେ ଥିବା ଦକ୍ଷତାର ଅନ୍ବେଷଣ ଉପରେ ଗୁରୁତ୍ୱାରୋପ କରିଛନ୍ତି । ପାଠପଢ଼ା ସହିତ ନିଜର ବିଭିନ୍ନ ରୁଚି ଉପରେ ଧ୍ୟାନଦେଲେ ପ୍ରତ୍ୟେକ ମଣିଷ ନିଜ ନିଜ କ୍ଷେତ୍ରରେ ଉତ୍କର୍ଷ ଲାଭ କରିପାରିବେ । କିଶୋରୀ ମାନେ ନିଜର ମନ କଥା ଓ ସେ ସମ୍ମୁଖୀନ ହେଉଥିବା ବିଭିନ୍ନ ସମସ୍ୟାକୁ କହିବା ପାଇଁ ପରିବାରରେ ମୁକ୍ତ ପରିବେଶ ସୃଷ୍ଟି ହେବା ଆବଶ୍ୟକ । ଭାବ ବିନିମୟ ଓ ପାରସ୍ପରିକ ସୁସମ୍ପର୍କ ଅନେକ ସମସ୍ୟାର ସମାଧାନ କରିଥାଏ ବୋଲି ସେ ମତବ୍ୟକ୍ତ କରିଥିଲେ । ପିଲାମାନଙ୍କର ମାନସିକ ସ୍ୱାସ୍ଥ୍ୟ, ଦକ୍ଷତା ବିକାଶ ଓ ସେମାନଙ୍କ ବିରୁଦ୍ଧରେ ଘଟୁଥିବା ହିଂସାକୁ ପ୍ରତିହତ କରିବା ପାଇଁ ବିଭିନ୍ନ ଅଙ୍ଗନବାଡ଼ି କେନ୍ଦ୍ରରେ ଅଦ୍ୱିକା କାର୍ଯ୍ୟକ୍ରମ ଜାରି ରହିଛି । ୨୦୨୦ ମସିହା ଅକ୍ଟୋବର ୧୧ ତାରିଖ ଆନ୍ତର୍ଜାତିକ କନ୍ୟା ଦିବସ ପାଳନଠାରୁ ଏହି କାର୍ଯ୍ୟକ୍ରମ ଜାରି ରହିଛି । ରାଜ୍ୟର ଆଇସିଡିଏସ୍ ଅଧିକାରୀ ନିଜର ଏହି କାର୍ଯ୍ୟକ୍ରମକୁ ସଫଳତାର ସହ ନିର୍ବାହ କରିଛନ୍ତି । ସେହିଭଳି ଏକ ଲକ୍ଷ ୫୦ ହଜାର ଅଦ୍ୱିକା ଗ୍ରୁପ୍ ମଧ୍ୟ ସୃଷ୍ଟି କରାଯାଇଛି । ଏହି ଅବସରରେ ଉପମୁଖ୍ୟମନ୍ତ୍ରୀ ଶ୍ରୀମତୀ ପରିଡ଼ା ଅଙ୍ଗନବାଡ଼ି କର୍ମୀ ଓ ଅଧିକାରୀମାନଙ୍କୁ ଭୂୟସୀ ପ୍ରଶଂସା କରି କହିଲେ ଯେ ପ୍ରାୟ ୩୦ ଲକ୍ଷ କିଶୋରୀଙ୍କୁ ଦକ୍ଷତା ଶିକ୍ଷା ପ୍ରଦାନ କରାଯାଇଛି । ପ୍ରାୟ ୪ ଲକ୍ଷ ସଖାବନ୍ଧୁ ସୃଷ୍ଟି କରାଯାଇଛି । କିଶୋର ଅବସ୍ଥାରେ ମାନସିକ, ଶାରୀରିକ ଓ ଅନ୍ତର୍ନିହିତ ଗୁଣର ବିକାଶ ହୋଇପାରିଲେ ସମାଜରେ ଜଣେ ପ୍ରତିଷ୍ଠିତ ହୋଇପାରିବ ।
କିଶୋରୀକିଶୋରମାନଙ୍କ ସହ ବାର୍ତ୍ତାଳାପ କରିବା ଅବସରରେ ଉପମୁଖ୍ୟମନ୍ତ୍ରୀ କହିଲେ ଯେ ଆଜିର ଯୁଗରେ ପୁରୁଷମାନଙ୍କ ସହ ମହିଳାମାନେ ମଧ୍ୟ ନିଜର ଆର୍ଥିକ ବିକାଶରେ ଅନୁରୂପ ଭାବେ ଯୋଗଦାନ କରିବାରେ ସକ୍ଷମ ହୋଇପାରୁଛନ୍ତି । ବିକଶିତ ଓଡ଼ିଶାରେ ସମସ୍ତଙ୍କର ସହଯୋଗ ଲୋଡ଼ି ସେ କହିଲେ ଯେ ପ୍ରତ୍ୟେକଟି କ୍ଷେତ୍ରରେ ଆମକୁ ଅଗ୍ରସର ହେବାକୁ ପଡ଼ିବ । ବିଭିନ୍ନ ବାଧାବିଘ୍ନର ସମ୍ମୁଖୀନ ହୋଇ ମଧ୍ୟ ଏହାକୁ ଆହ୍ୱାନ ଭାବେ ଗ୍ରହଣ କରି ନୂତନ ସୁଯୋଗକୁ ସାଉଁଟି ପାରିଲେ ନିଜର ଲକ୍ଷ୍ୟସ୍ଥଳରେ ପହଞ୍ଚିହେବ । ପ୍ରଯୁକ୍ତି ବିଦ୍ୟା ଓ ସ୍ମାର୍ଟଫୋନ୍ର ଯଥାର୍ଥ ଓ ସତ୍ ଉପଯୋଗ ଉପରେ ଉପମୁଖ୍ୟମନ୍ତ୍ରୀ ଗୁରୁତ୍ୱ ଦେଇଥିଲେ ।
ଏହି ଦୁଇଦିନିଆ କାର୍ଯ୍ୟକ୍ରମରେ ୨୭ଟି ଜିଲ୍ଲାର ୧୨୭ ଜଣ କିଶୋରୀକିଶୋର ଅଂଶଗ୍ରହଣ କରିଥିଲେ । ୧୦ରୁ ୧୪ ଓ ୧୫ରୁ ୧୯ ବର୍ଷ ବୟସର ପିଲାମାନଙ୍କ ମଧ୍ୟରେ ସଂଗୀତ, ନୃତ୍ୟ, କାହାଣୀ ପଠନ, ରିଲସ୍, ଚିତ୍ରାଙ୍କନ ପ୍ରତିଯୋଗିତା ଅନୁଷ୍ଠିତ ହୋଇ କୃତୀ ପ୍ରତିଯୋଗୀମାନଙ୍କୁ ଅର୍ଥରାଶି ସହ ମାନପତ୍ର ପ୍ରଦାନ କରାଯାଇଥିଲା ।
ବିଭାଗୀୟ ପ୍ରମୁଖ ଶାସନ ସଚିବ ଶ୍ରୀମତୀ ଶୁଭା ଶର୍ମା, ସମନ୍ୱିତ ଶିଶୁ ବିକାଶ ସେବା ଓ ସାମାଜିକ କଲ୍ୟାଣ ନିର୍ଦ୍ଦେଶିକା ଶ୍ରୀମତୀ ମୋନିକା ବାନାର୍ଜୀ, ଚଳଚ୍ଚିତ୍ର ତାରକା ପିଙ୍କି ପ୍ରଧାନ, ଅଲମ୍ପିଆନ୍ ଅନୁରାଧା ବିଶ୍ୱାଳ, ହମାରା ବଚ୍ପନ୍ ଟ୍ରଷ୍ଟର ଶ୍ରୀମତୀ ରିନାରାଣୀ ବେହେରା, ଶ୍ରୀମତୀ ସୀମା ଶ୍ରଦ୍ଧାଞ୍ଜଳି, ବିଶ୍ୱ ଦକ୍ଷତା କେନ୍ଦ୍ରର ନିର୍ଦ୍ଦେଶକ ପ୍ରମୁଖ ଯୋଗଦେଇ ଅଂଶଗ୍ରହଣକାରୀଙ୍କୁ ଉତ୍ସାହିତ କରିଥିଲେ ।
