୫୩ତମ ଅଲ ଓଡିଶା ଆଡଭୋକେଟ ଆସୋସିଏସନର ବାର୍ଷିକ ସମ୍ମିଳନୀ ଅନୁଷ୍ଠିତ
୫୩ତମ ଅଲ ଓଡିଶା ଆଡଭୋକେଟ ଆସୋସିଏସନର ବାର୍ଷିକ ସମ୍ମିଳନୀ ମାଲକାନଗିରି ସ୍ଥିତ ଡିଏନକେ ପଡିଆ ଠାରେ ପ୍ରଥମ ଥର ପାଇଁ ଶନିବାର ଓ ରବିବାର ଦୁଇ ଦିନ ଧରି ମହା ଆଡ଼ମ୍ବରରେ ଅନୁଷ୍ଠିତ ହୋଇଯାଇଛି। ଏହି ଉତ୍ସବରେ ବରିଷ୍ଠ ହାଇକୋର୍ଟର ଜଷ୍ଟିସ ଶିବ ଶଙ୍କର ମିଶ୍ର ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ସୁପ୍ରିମକୋର୍ଟର ଅବସରପ୍ରାପ୍ତ ଜଷ୍ଟିସ ଭି ଗୋପାଳ ଗୌଡା ମୁଖ୍ୟ ବକ୍ତା ଭାବରେ ଯୋଗ ଦେଇଥିଲେ। ପ୍ରଥମ ଦିବସର ଓଡିଶା ଆଇନଜୀବୀ ସଂଘର ରାଜ୍ୟ ସଭାପତି ଜ୍ଞାନ ରଞ୍ଜନ ମହାନ୍ତି ଏବଂ ନନ୍ଦ ନନ୍ଦନ ଶତପଥୀ ସ୍ୱାଗତ ଭାଷଣ ପ୍ରଦାନ କରିଥିଲେ।
ଏହି ଅବସରରେ ଜଷ୍ଟିସ୍ ମିଶ୍ର ଆଇନଜୀବୀଙ୍କୁ ସମ୍ବୋଧିତ କରି ତାଙ୍କ ଭାଷଣରେ କହିଛନ୍ତି ଯେ ନ୍ୟାୟିକ ବ୍ୟବସ୍ଥାରେ ଆଇନଜୀବୀଙ୍କ ସ୍ଥାନ ଗୁରୁତ୍ୱପୂର୍ଣ୍ଣ। ସେମାନେ ନ୍ୟାୟ ଅନ୍ୱେଷଣକାରୀ (ଗ୍ରାହକ) ଏବଂ ନ୍ୟାୟପାଳିକା ମଧ୍ୟରେ ଏକ ସେତୁ ଭାବରେ କାର୍ଯ୍ୟ କରନ୍ତି । ତେଣୁ ଆମର ନ୍ୟାୟ ବିତରଣ ବ୍ୟବସ୍ଥା ଓକିଲମାନଙ୍କର ଦକ୍ଷତା ଏବଂ ସେବା ଉପରେ ନିର୍ଭର କରେ । ସେହି ପରି ପୂର୍ବତନ ପ୍ରଧାନ ବିଚାରପତି ଭି ଗୋପାଳ ଗୌଡା ଆଇନଜୀବୀମାନଙ୍କୁ ସଂସଦ ଏବଂ ରାଜ୍ୟ ବିଧାନସଭାରେ ପ୍ରତିନିଧିତ୍ୱ କରିବାକୁ ଦାବି କରିଥିଲେ ଯାହା ଦ୍ଵାରା ଆଇନ ଏବଂ ଶାସନ ଗଠନରେ ସେମାନଙ୍କର ଭୂମିକା ବୃଦ୍ଧି କରିଥାଏ । ସେ କହିଛନ୍ତି ଯେ ଗଣତନ୍ତ୍ର ବର୍ତ୍ତମାନ ଇଣ୍ଟେନ୍ସିଭ୍ କେୟାର ୟୁନିଟ୍ (ଆଇସିୟୁ) ରେ ଅଛି । ଏବଂ ନାଗରିକଙ୍କ ଅଧିକାରର ସୁରକ୍ଷା ପାଇଁ ଏହି ଗୁରୁତ୍ଵପୂର୍ଣ୍ଣ ସମୟରେ ଓକିଲମାନଙ୍କର ଅଧିକ ଦାୟିତ୍ଵ ରହିଛି। ସେ କହିଛନ୍ତି, “କୋର୍ଟ ଲୋକଙ୍କ ପାଇଁ ଏବଂ ଆଇନଜୀବୀମାନେ ସେମାନଙ୍କର ଜୀବନ, ସ୍ୱାଧୀନତା ଏବଂ ସମ୍ପତ୍ତିର ସୁରକ୍ଷାକାରୀ। ନ୍ୟାୟ ପ୍ରଦାନ ଏବଂ ନ୍ୟାୟପାଳିକା ମଧ୍ୟରେ ସମନ୍ୱୟ ରକ୍ଷା କରିବା ଜରୁରୀ ଅଟେ।”
ଏହି ଅବସରରେ ହାଇକୋର୍ଟ ବାର ଆସୋସିଏସନ ସଦସ୍ୟ ବିଭୂପ୍ରସାଦ ତ୍ରିପାଠୀ, ବାର ପରିଷଦ ସଦସ୍ୟ ପି ରମେଶ କୁମାର ପାତ୍ର, ହାଇକୋର୍ଟ ବାର ଆସୋସିଏସନ ସଭାପତି ବି ଦାଶ, ବାର୍ କାଉନସିଲର ଉପାଧ୍ୟକ୍ଷ ଆର ମହାନ୍ତି, ଓଡିଶା ବାର୍ କାଉନସିଲର ଅଧ୍ୟକ୍ଷ ସିତାଂଶୁ ମୋହନ ଦ୍ୱିବେଦୀ ଯୋଗ ଦେଇ ରାଜ୍ୟର ସମସ୍ତ ଆଇନଜୀବୀଙ୍କ ପାଇଁ ସେମାନଙ୍କର ସାମାଜିକ ସୁରକ୍ଷା, ପେନ୍ସନ୍, ସ୍ୱାସ୍ଥ୍ୟ ବୀମା ତଥା ଅନ୍ୟାନ୍ୟ ଦାବି ସହିତ ସୁବିଧା ତଥା ସୁଯୋଗ ପ୍ରଦାନ ଉପରେ ଗୁରୁତ୍ୱାରୋପ କରିଥିଲେ। ଏହି ଅବସରରେ ଏହି ସମୟରେ ଆସୋସିଏସନର ସ୍ମରଣିକା ଅତିଥିଙ୍କ ପ୍ୟାନେଲ ଦ୍ୱାରା ଉନ୍ମୋଚିତ ହୋଇଥିଲା । ପ୍ରଥମ ଦିବସରେ ପରିଶେଷରେ ସଂଜିତ୍ କୁମାର ପାଣିଗ୍ରାହୀ ସାଧାରଣ ସମ୍ପାଦକ ଏଓଏଲ୍ଏ ଧନ୍ୟବାଦ୍ ଅର୍ପଣ ଭାଷଣ ପ୍ରଦାନ କରିଥିଲେ ।
ମୁଖ୍ୟତଃ ଏହି କାର୍ଯ୍ୟକ୍ରମ ଆଇନ ସଂସ୍କାର, କଲ୍ୟାଣକାରୀ ପଦକ୍ଷେପ ଇତ୍ୟାଦି ବିଷୟରେ ଆଲୋଚନା କରିବା ପାଇଁ ଏକ ସମୃଦ୍ଧ ଅନୁଭୂତିକୁ ପ୍ରମାଣିତ କରିଥିଲା । ଦୁଇଦିନିଆ ଉକ୍ତ କାର୍ଯ୍ୟକ୍ରମରେ ରାଜ୍ୟର ଅତି କମରେ ୧୫୦୦ ଓକିଲ ଅଂଶଗ୍ରହଣ କରିଥିଲେ।
ଅନ୍ତିମ ଦିବସ ରବିବାର ଦିନ ବୈଷୟିକ ଅଧିବେଶନ ସମାପ୍ତ ଅଧିବେଶନଟି ମୁଖ୍ୟ ଅତିଥି ହାଇକୋର୍ଟ ବିଚାରପତି ଆଦିତ୍ୟ କୁମାର ମହାପାତ୍ରଙ୍କ ଦ୍ଵାରା ଆରମ୍ଭ ହୋଇଥିଲା । ତାପରେ ଶ୍ରୀ ନରସିଂହନାଥ ତ୍ରିପାଠୀ, ସଭାପତି, ନବରଙ୍ଗପୁର ବାର୍ ଆସୋସିଏସନ୍-କମ-ସହ-ଚେୟାରମ୍ୟାନ୍, ସ୍ୱାଗତ କମିଟି ମଞ୍ଚରେ ଅତିଥିମାନଙ୍କୁ ସ୍ୱାଗତ କରିବା ପରେ ପରେ ବନ୍ଦେ ଉତ୍କଳ ଜନନୀ ଗାନ ସହ କାର୍ଯ୍ୟକ୍ରମ ଆରମ୍ଭ ହୋଇଥିଲା । ତାପରେ ଅତିଥିମାନଙ୍କୁ ସ୍ୱାଗତ ଜଣାଇଥିଲେ । ଏଓଏଲ୍ଏ ‘ର ସଚିବ ମାନ୍ୟବର ଶ୍ରୀ ମନୋରଂଜନ ମହାନ୍ତିଙ୍କ ଦ୍ୱାରା ଧନ୍ୟବାଦ ଭାଷଣ ଅର୍ପଣ କରିବା ପରେ ପରେ ଓକିଲମାନଙ୍କ ମଧ୍ୟରେ ସଂଳାପ ଅଧିବେଶନ ହୋଇଥିଲା। ତାପରେ ଏଓଏଲ୍ଏ ‘ର ଅଫିସ୍ ଧାରକ ଚୟନ ପ୍ରକ୍ରିୟା ହୋଇଥିଲା । ତାପରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ରିପୋର୍ଟ:ମାଲକାନଗିରି ଜିଲ୍ଲା ଈପିଏରୁ ତିରୁମାଲା ପ୍ରସାଦ ପଟ୍ଟନାୟକ
