କଟକ ଛାତ୍ରୀଙ୍କୁ ଗଣଦୁଷ୍କର୍ମ: ସାରା ରାଜ୍ୟ ହୁଲସ୍ତୁଲ, ଘର ଛାଡ଼ିଲେ ପୀଡ଼ିତା
ରାଜ୍ୟର ଗ୍ରାମାଳ ଠାରୁ ଆରମ୍ଭ କରି ସହରାଞ୍ଚଳ ମାନଙ୍କରେ ଗଣଦୁଷ୍କର୍ମ ସଂକ୍ରମଣ ରୋଗ ଭଳି ଦିନକୁ ଦିନ ବ୍ୟାପୀ ବାରେ ଲାଗିଥିବା ଦେଖାଯାଇଛି। ଗଣଦୁଷ୍କର୍ମ ସଂକ୍ରମଣକୁ ରୋକ ଲଗାଇବା ପାଇଁ ସରକାର ଆଇନ ସଂଶୋଧନରେ ଯେତେ ବ୍ୟବସ୍ଥା କରିଦେଇଥିଲେ ମଧ୍ୟ ଗଣଦୁଷ୍କର୍ମ ସଂକ୍ରମଣ ରୋଗ ଭଳି ବ୍ଯାପିବା ସାଧାରଣରେ ଆଇନ୍ ପ୍ରତି ସାଧାରଣ ଜନତାଙ୍କ ଆସ୍ଥା ତୁଟିଯିବା ଭଳି ଆଶଙ୍କା ସୃଷ୍ଟି ହୋଇଥିବା ଆଲୋଚ୍ଯର ବିଷୟ ହୋଇଛି। କଟକରୁ ଆମ ପ୍ରତିନିଧି ବିରଞ୍ଚି ନାରାୟଣ ପତ୍ରୀଙ୍କ ରିପୋର୍ଟ।
ଏହି ଘଟଣାରେ ମହିଳା କମିସନଙ୍କ କାର୍ଯ୍ୟାଳୟ ହସ୍ତକ୍ଷେପ କରି କଟକ କମିସନରେଟ୍ ପୁଲିସକୁ ତଦନ୍ତ ରିପୋର୍ଟ ମାଗିଛନ୍ତି।
ଏହି ଜଘନ୍ୟ ଅପରାଧକୁ ନେଇ ବାରବାଟୀ-କଟକ ବିଧାୟିକା ସୋଫିଆ ଫିରଦୋସ୍ ପୁଲିସକୁ ଘେରିଛନ୍ତି।
କଟକ: କଟକର ଜଣେ କଲେଜ ଛାତ୍ରୀଙ୍କୁ ବାରଙ୍ଗରେ ଗଣଦୁଷ୍କର୍ମ କରାଯିବା ଘଟଣା ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଛି। ଏହି ଘଟଣାରେ ମହିଳା କମିସନଙ୍କ କାର୍ଯ୍ୟାଳୟ ହସ୍ତକ୍ଷେପ କରି କଟକ କମିସନରେଟ୍ ପୁଲିସକୁ ତଦନ୍ତ ରିପୋର୍ଟ ମାଗିଛନ୍ତି। ଅନ୍ୟପଟେ ପୀଡ଼ିତା ଲୋକଲଜ୍ଜାରେ ଘର ଛାଡ଼ି ସଂପର୍କୀୟ ଘରକୁ ଚାଲି ଯାଇଥିବା ପୁଲିସ ପକ୍ଷରୁ ସୂଚନା ମିଳିଛି। କଟକର ଏକ କଲେଜରେ ଯୁକ୍ତ ତିନି ଦ୍ବିତୀୟ ବର୍ଷରେ ପାଠ ପଢ଼ୁଥିବା ଏହି ଛାତ୍ରୀଙ୍କ ଜନ୍ମଦିନରେ ପୁରୀଘାଟ ଅଞ୍ଚଳର ଏକ କାଫେରେ ତାଙ୍କ ପୁରୁଷ ବନ୍ଧୁ ଆଶୁତୋଷ ଦୁଷ୍କର୍ମ କରିଥିଲା। ଏହି ସମୟର ଭିଡିଓକୁ ରେକର୍ଡ କରି ପରବର୍ତ୍ତୀ ସମୟରେ ପୀଡ଼ିତାଙ୍କୁ ବ୍ଲାକମେଲ୍ କରିବା ସହ ବାରଙ୍ଗ ଅଞ୍ଚଳରେ ଆଶୁତୋଷର ବନ୍ଧୁ ସୌମ୍ୟ ଘରେ ୬ ଜଣ ବନ୍ଧୁ ମିଶି ଗଣଦୁଷ୍କର୍ମ କରିଥିଲେ। ଏହି ଘଟଣାରେ କଟକ ଡିସିପି ଜଗମୋହନ ମୀନା ଶୁକ୍ରବାର ଏକ ସାମ୍ବାଦିକ ସମ୍ମିଳନୀ ଡାକି ଘଟଣା ସମ୍ପର୍କରେ ବିସ୍ତୃତ ସୂଚନା ଦେଇଛନ୍ତି। ଶ୍ରୀ ମୀନା କହିଛନ୍ତି ଯେ ଗଲା ୪ ତାରିଖରେ ଏକ ମାମଲା (କେସ୍ ନଂ ୩୫୩) ରୁଜୁ ହୋଇଥିଲା। ବିଏନ୍ଏସ୍ର ଧାରା ୭୦ (୧), ୨୯୬, ୩୫୧, ୪୯ ଏବଂ ୩ ଏସ୍ସି ଓ ଏସ୍ଟି ଆକ୍ଟ ଓ ୬୭(ଏ) ଆଇଟି ଆକ୍ଟରେ ମାମଲା ରୁଜୁ ହୋଇ ତଦନ୍ତ ଚାଲିଛି। ଜୋନ୍ ୬ ଏସିପି ସ୍ବସ୍ତିକ ପଣ୍ଡାଙ୍କୁ ତଦନ୍ତ ଦାୟିତ୍ବ ଦିଆଯାଇଥିବା ବେଳେ ବାଦାମବାଡ଼ି ଓ ପୁରୀଘାଟ ଥାନା ଆଇଆଇସିଙ୍କୁ ନେଇ ଏକ ସ୍ବତନ୍ତ୍ର ଟିମ୍ ଗଠନ ହୋଇଛି। ଯଦି କୌଣସି ମହିଳା ଏଭଳି ପରିସ୍ଥିତିରେ ଫସିଯାଇଛନ୍ତି ଏବଂ ବ୍ଲାକମେଲ୍ର ଶିକାର ହେଉଛନ୍ତି, ତେବେ ଥାନାରେ ଥିବା ମହିଳା ଓ ଶିଶୁ ଡେସ୍କ୍ରେ ଅଭିଯୋଗ କରିପାରିବେ। ଆଇନ ଅନୁଯାୟୀ ପଦକ୍ଷେପ ଗ୍ରହଣ କରାଯିବ ବୋଲି ଶ୍ରୀ ମୀନା କହିଛନ୍ତି।
ଅନ୍ୟପଟେ ଏହି ମାମଲାରେ ସମ୍ପୃକ୍ତ ୬ ଜଣଙ୍କ ମଧ୍ୟରୁ ୫ ତାରିଖରେ ୩ ଜଣ ଗିରଫ ହୋଇଥିବା ବେଳେ ୬ ତାରିଖରେ ଅବଶିଷ୍ଟ ୩ ଜଣ ଗିରଫ ହୋଇଛନ୍ତି। ତଦନ୍ତରେ ଅନ୍ୟ କେହି ସମ୍ପୃକ୍ତ ଥିବା ଜଣାପଡ଼ିଲେ ସେହି ଅନୁଯାୟୀ ପଦକ୍ଷେପ ଗ୍ରହଣ କରାଯିବ। ସମସ୍ତ ଅଭିଯୁକ୍ତଙ୍କ ମୋବାଇଲ୍ ଫୋନ୍ ଜବତ ହୋଇଛି। ବାରଙ୍ଗ ଥାନା ଅଞ୍ଚଳରେ ଥିବା ଅଭିଯୁକ୍ତ ସୌମ୍ୟର ଘର ଓ ପୁରୀଘାଟ ଅଞ୍ଚଳରେ ଥିବା କାଫେ ଉପରେ ପୁଲିସ ଚଢ଼ଉ କରି ସେଠାକାର ଲୋକଙ୍କୁ ଘଟଣା ସମ୍ପର୍କରେ ପଚରାଉଚରା କରିବା ସହିତ ବୟାନ ରେକର୍ଡ କରିଛି। ୬ ଜଣ ଅଭିଯୁକ୍ତଙ୍କ ମଧ୍ୟରେ ଜଣେ ନାବାଳକ ଥିବା ଜଣାପଡ଼ିଛି। ଏହି ଘଟଣାରେ ମହିଳା କମିସନ୍ଙ୍କ କାର୍ଯ୍ୟାଳୟର ସଦସ୍ୟା କଟକ କମିସନରେଟ୍ ପୁଲିସର ଜୋନ୍ ୬ ଏସିପି ସ୍ବସ୍ତିକ ପଣ୍ଡାଙ୍କୁ ଘଟଣାର ତଦନ୍ତ ରିପୋର୍ଟ ମାଗିଛନ୍ତି। ଏହି ଜଘନ୍ୟ ଅପରାଧକୁ ନେଇ ବାରବାଟୀ-କଟକ ବିଧାୟିକା ସୋଫିଆ ଫିରଦୋସ୍ ପୁଲିସକୁ ଘେରିଛନ୍ତି। ଗଣମାଧ୍ୟମକୁ ସୂଚନା ଦେଇ କହିଛନ୍ତି, କଟକ ଭଳି ଏକ ସଂସ୍କୃତିସମ୍ପନ୍ନ ଅଞ୍ଚଳରେ ଯଦି ଏଭଳି ଘଟଣା ଘଟିପାରୁଛି ତେବେ ଅପରାଧୀଙ୍କ ମନରେ ପୁଲିସ ପ୍ରତି ଆଦୌ ଭୟ ନାହିଁ ବୋଲି ମୁକ୍ତ କଣ୍ଠରେ ସ୍ବୀକାର କରିବାକୁ ପଡ଼ିବ। ଓଡ଼ିଶାରେ ନିୟମିତ ଏଭଳି ଘଟଣା ଘଟୁଛି। ରାଜ୍ୟରେ ମହିଳା ନିର୍ଯାତନା ବଢ଼ି ଚାଲିଛି। ମହିଳାଙ୍କୁ ସୁରକ୍ଷା ଯୋଗାଇବା ସରକାରଙ୍କର ପ୍ରଥମ କର୍ତ୍ତବ୍ୟ ହେବା ଦରକାର। ଡିଜି ପୁଲିସ ମଧ୍ୟ ଏ ଦିଗରେ ଦୃଷ୍ଟି ଦେବା କଥା। ଏଭଳି ଦୁଷ୍କର୍ମ ଆମ ରାଜ୍ୟରେ କାହିଁକି ବଢ଼ିଛି, ସେ ନେଇ ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀ ଗମ୍ଭୀରତାର ସହ ନିଅନ୍ତୁ ବୋଲି ଶ୍ରୀମତୀ ଫିରଦୋସ୍ କହିଛନ୍ତି।
biranchi narayan patri nka report
