କାଠ ମିସ୍ତ୍ରୀଙ୍କ ପତ୍ନୀ ପାଇଲେ ଓଏଏସ୍

ଦୃଢ଼ ଇଚ୍ଛା ଶକ୍ତି ଓ ମନୋବଳ ଥିଲେ ସବୁ ସମ୍ଭବ।

କେସିଙ୍ଗା :ଦୃଢ଼ ଇଚ୍ଛା ଶକ୍ତି ଓ ମନୋବଳ ଥିଲେ ସବୁ ସମ୍ଭବ। ଏହା କରି ଦେଖାଇଛନ୍ତି କଳାହାଣ୍ଡି ଜିଲ୍ଲା କେସିଙ୍ଗା ସହରର ଦୁଇ ପିଲାର ମାଆ ସଙ୍ଗୀତା ସେଠୀ। ଦିନେ ସ୍ୱପ୍ନ ଦେଖିଥିଲେ ପାଠ ପଢ଼ିବା ସହ ଏକ ସରକାରୀ ଚାକିରୀ ଟିଏ କରିବା ପାଇଁ। କିନ୍ତୁ ଯୁକ୍ତ ଦୁଇ ପରେ ସଂଯୋଗ କ୍ରମେ ତାଙ୍କର ବିବାହ ହୋଇଯାଇଥିଲା। ଏଵଂ ଦେଖୁ ଦେଖୁ ଦୁଇ ପିଲାର ମାଆ ମଧ୍ୟ ହୋଇଗଲେ। କିନ୍ତୁ ସବୁ ପ୍ରତିକୂଳ ପରିସ୍ଥିତି ସତ୍ତ୍ୱେ ସେ ହାର ମାନି ନ ଥିଲେ।ସଂଗୀତା ନିଜ ପ୍ରଚେଷ୍ଟାରେ ପ୍ରଥମେ ଯୁକ୍ତତିନି ଓ ପରେ ଅର୍ଥନୀତିରେ ମାଣିକେଶ୍ଵରୀ ବିଶ୍ବବିଦ୍ୟାଳୟରୁ ଅର୍ଥନୀତିରେ ପିଜି କରିଥିଲେ। ତାଙ୍କ ସ୍ଵାମୀ ବଂଶିଧର ପ୍ରଧାନ ଜଣେ କାଠ ମହାରଣା। ସ୍ଵାମୀ କେବେ ବି ସଙ୍ଗିତାଙ୍କୁ ହତୋତ୍ସାହିତ କରି ନଥିଲେ,ଓଲଟା ପଢ଼ିବା ସୁଯୋଗ ଦେଇଥିଲେ।ତାଙ୍କୁ ପ୍ରୋତ୍ସାହନ ଦେବା ସହ ପାଠପଢ଼ା ବେଳେ ଉତ୍ସାହିତ କରି ଆସିଥିଲେ।

ଆଜି ଦୃଢ଼ ଇଛାଶକ୍ତି ଓ ଗଭୀର ପ୍ରଚେଷ୍ଟା ଓ ଅକ୍ଲାନ୍ତ ପରିଶ୍ରମ ବଳରେ ସଙ୍ଗୀତା ସଫଳତା ପାଇଛନ୍ତି।ପରିସ୍ଥିତି ଇଛାଶକ୍ତି ପାଖରେ ହାର ମାନିଥାଏ।ଏହାକୁ ପ୍ରମାଣିତ କରିଛନ୍ତି କେସିଙ୍ଗାରଏହି ଗୃହିଣୀ ସଙ୍ଗୀତା ସେଠୀ। ଓଡ଼ିଶା ସିଭିଲ ସର୍ଭିସ ପରୀକ୍ଷାରେ ୧୧୩ ନମ୍ବରରେ ରହି ଅନ୍ୟମାନଙ୍କ ପାଇଁ ସେ ଉଦାହରଣ ପାଲଟିଛନ୍ତି।ଏହି କୃତିତ୍ୱ ପାଇଁ ସଙ୍ଗୀତା ତାଙ୍କ ସ୍ବାମ ତାଙ୍କ ବାପା ମା’ ଓ ତା ଗାଇଡ୍ କରୁଥିବା ମେଣ୍ଟରଙ୍କୁ ଶ୍ରେୟ ଦେଇଛନ୍ତି। ଏକ ଗରିବ ପରିବାରର ହେଲେ ବି ସେ ଜଣେ ବଡ ଲୋକ ହେବା ଲକ୍ଷ୍ୟ ରଖି ଏହି ପରିଶ୍ରମ କରିଥିବା କହିଛନ୍ତି।ବୈବାହିକ ଜୀବନର ସମସ୍ତ ପ୍ରତିକୂଳ ପରିସ୍ଥିତିରେ ସଫଳତା ପାଇବା ଏତେ ସହଜ ହୋଇ ନ ଥାଏ। ଏଣୁ ସଙ୍ଗୀତା ଆଜି ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି ।କାଠ ମିସ୍ତ୍ରୀଙ୍କ ପତ୍ନୀ ଆଜି ଓଏଏସ୍ ଜାଣିବା ପରେ ସାରା ଜିଲ୍ଳାର କୋଣ ଅନୁକୋଣରୁ ସଙ୍ଗୀତା ସେଠୀ ଙ୍କୁ ଏବେ ଶୁଭେଚ୍ଛାର
ସୁଅ ଛୁଟିଛି ।

ବିଦ୍ୟାଧର ସାହୁଙ୍କ ରିପୋର୍ଟ…..