ଖୋର୍ଦ୍ଧା ରୋଡ଼ ମଣ୍ଡଳରେ ୧୭ ଜଣ ଅବସରପ୍ରାପ୍ତ ଟିକେଟ୍ ଯାଞ୍ଚ କର୍ମଚାରୀଙ୍କୁ ଭାବବିହ୍ୱଳ ବିଦାୟ ସମ୍ବର୍ଦ୍ଧନା

ଖୋରଧା:-ପୂର୍ବତଟ ରେଳପଥର ଖୋର୍ଦ୍ଧା ରୋଡ଼ ମଣ୍ଡଳ ପକ୍ଷରୁ ଟିକେଟ୍ ଯାଞ୍ଚ ବିଭାଗର ୧୭ ଜଣ ଅବସରପ୍ରାପ୍ତ କର୍ମଚାରୀଙ୍କ ସମ୍ମାନାର୍ଥେ ଏକ ଭାବବିହ୍ୱଳ ବିଦାୟ ସମାରୋହ ଆୟୋଜିତ ହୋଇଯାଇଛି। ମଣ୍ଡଳର ବରିଷ୍ଠ ଟିକେଟ୍ ଯାଞ୍ଚ ନିରୀକ୍ଷକ ଶ୍ରୀ ଅନିଲ କୁମାର ମିଶ୍ରଙ୍କ ନେତୃତ୍ୱରେ ଆୟୋଜିତ ଏହି ସମାରୋହରେ ବରିଷ୍ଠ ମଣ୍ଡଳ ବାଣିଜ୍ୟ ପ୍ରବନ୍ଧକ ଶ୍ରୀ ଅନିଲ କୁମାର ସିଂ ମୁଖ୍ୟ ଅତିଥି ଏବଂ ସହକାରୀ ବାଣିଜ୍ୟ ପ୍ରବନ୍ଧକ ସୁଶ୍ରୀ ଡିମ୍ପଲ୍ କୌଶିକ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ।

ଏଥିସହ ଷ୍ଟେସନ ପରିଚାଳକ ଶ୍ରୀ ଏନ୍.ପ୍ରଧାନ ଓ ଷ୍ଟେସନ ମୁଖ୍ୟ ଟିକେଟ୍ ନିରୀକ୍ଷକ ଶ୍ରୀ ଏଲ୍.ଡି.ମହାନ୍ତି ଉପସ୍ଥିତ ଥିଲେ।

ଦୀର୍ଘ ବର୍ଷ ଧରି ରେଳବାଇର ଟିକେଟ୍ ଯାଞ୍ଚ ବିଭାଗରେ ନିଷ୍ଠା, ଦାୟିତ୍ୱବୋଧ ଓ ସମର୍ପଣର ସହ ସେବା ପ୍ରଦାନ କରିଥିବା ୧୭ ଜଣ ଅବସରପ୍ରାପ୍ତ କର୍ମଚାରୀଙ୍କୁ ଏହି ଅବସରରେ ପୁଷ୍ପଗୁଚ୍ଛ ଓ ସ୍ମୃତିଚିହ୍ନ ପ୍ରଦାନ କରି ସମ୍ବର୍ଦ୍ଧିତ କରାଯାଇଥିଲା।
ସମ୍ବର୍ଦ୍ଧିତ କର୍ମଚାରୀମାନେ ହେଲେ ଶ୍ରୀ ବାବୁ ବାହନ ବେହେରା, ଶ୍ରୀ ପ୍ରଭାକର ବରାଳ, ଶ୍ରୀ ଗିରିଜା ଶଙ୍କର ପଟ୍ଟନାୟକ, ଶ୍ରୀ ସରୋଜ କୁମାର ମାଙ୍ଗରାଜ, ଶ୍ରୀ ରବୀନ୍ଦ୍ର କୁମାର ସାହୁ, ଶ୍ରୀ ସୁଶୀଲ କୁମାର ବେହେରା, ଶ୍ରୀ ଜଗଦୀଶ ସାହୁ, ଶ୍ରୀ ରାମକୃଷ୍ଣ ମହାନ୍ତି, ଶ୍ରୀ ସରତ କୁମାର ପଣ୍ଡା, ଶ୍ରୀ ଜେ.ପି. ମହାନ୍ତି, ଶ୍ରୀ ବାହନ ଛଦାଇ, ଶ୍ରୀ ଜି. ସତ୍ୟନାରାୟଣ, ଶ୍ରୀ କୈଳାସ ଚନ୍ଦ୍ର ଜେନା, ଶ୍ରୀ ଚିତ୍ତରଞ୍ଜନ ବଳଜୀ ପୃଷ୍ଟି, ଶ୍ରୀ କିରଣ କୁମାର ପଟ୍ଟନାୟକ, ଶ୍ରୀ ଅନିଲ କେ. ବେହେରା ଓ ଶ୍ରୀ ପ୍ରଫୁଲ୍ଲ କୁମାର ଦାସ।

ଏହି ଅବସରରେ ପୂର୍ବରୁ ଅବସର ଗ୍ରହଣ କରିଥିବା ବରିଷ୍ଠ କର୍ମଚାରୀ ମାନଙ୍କୁ ମଧ୍ୟ ଆମନ୍ତ୍ରଣ କରାଯାଇଥିଲା। ସେମାନେ ନିଜର ଦୀର୍ଘ ଅଭିଜ୍ଞତା, କାର୍ଯ୍ୟକାଳର ସ୍ମୃତି ଓ ଅନୁଭୂତି ଉପସ୍ଥିତ କର୍ମଚାରୀଙ୍କ ସହ ବାଣ୍ଟିବା ସହ ମୂଲ୍ୟବାନ ପରାମର୍ଶ ପ୍ରଦାନ କରିଥିଲେ।

ସମାରୋହକୁ ଆକର୍ଷଣୀୟ କରିବା ପାଇଁ ଏକ ମନୋରଞ୍ଜନ ଧର୍ମୀ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥିଲା।
ମଣ୍ଡଳର ରେଳ କର୍ମଚାରୀଙ୍କ ପିଲାମାନେ ସୁନ୍ଦର ସଙ୍ଗୀତ ଓ ନୃତ୍ୟ ପରିବେଷଣ କରିଥିଲେ। ସେମାନଙ୍କ ପ୍ରତିଭାକୁ ସ୍ୱୀକୃତି ଦେବା ସହ ଉତ୍ସାହିତ କରିବା ପାଇଁ ଅତିଥିମାନେ ସେମାନଙ୍କୁ ମଞ୍ଚରେ ସମ୍ବର୍ଦ୍ଧିତ କରିଥିଲେ। ଏହି ସମାରୋହରେ ରେଳ ପରିବାରର ବହୁ ଅଧିକାରୀ, କର୍ମଚାରୀ ଓ ଟିକେଟ୍ ଯାଞ୍ଚ ବିଭାଗର ସଦସ୍ୟମାନେ ଯୋଗଦେଇ ଅବସରପ୍ରାପ୍ତ ସହକର୍ମୀମାନଙ୍କୁ ଶୁଭେଚ୍ଛା ଜଣାଇଥିଲେ। ଶେଷରେ ଧନ୍ୟବାଦ ଅର୍ପଣ ସହ କାର୍ଯ୍ୟକ୍ରମର ପରିସମାପ୍ତି ଘଟିଥିଲା। ଏହି ବିଦାୟ ସମାରୋହ ଅବସରପ୍ରାପ୍ତ କର୍ମଚାରୀଙ୍କ ଦୀର୍ଘ ବର୍ଷର ସେବା, ତ୍ୟାଗ ଓ ଅବଦାନକୁ ସ୍ମରଣୀୟ କରିବା ସହ ରେଳ ପରିବାରର ଏକତା ଓ ସୌହାର୍ଦ୍ଦ୍ୟର ନିଦର୍ଶନ ପାଲଟିଥିଲା।