ଦୁଇ ଦିବସୀୟ ‘ମୋଟାପା’ ନିବାରଣ ଶିବିର ଅନୁଷ୍ଠିତ
ଭୁବନେଶ୍ୱର:ମୋଟାପା ବା ମୋଟାପଣ ଅବସ୍ଥା ଯୋଗୁଁ ବହୁ ଲୋକ ବିଭିନ୍ନ ସ୍ୱାସ୍ଥ୍ୟ ସମସ୍ୟାର ସମ୍ମୁଖୀନ ହୋଇଥା’ନ୍ତି l ଏହାର ସମାଧାନ ଓ ନିବାରଣ ପାଇଁ ଖାଦ୍ୟପେୟ ଓ ଦିନଚର୍ଯ୍ୟାରେ ଶୃଙ୍ଖଳା ସହିତ ନିୟମିତ ଯୋଗାଭ୍ୟାସ ଓ ସଚେତନତା ଜରୁରୀ l “ଭାରତୀୟ ଯୋଗ ସଂସ୍ଥାନ, ଓଡ଼ିଶା ପ୍ରାନ୍ତ ” ଅଧିନସ୍ଥ ଭୁବନେଶ୍ୱର ନୟାପଲ୍ଲୀ ଯୋଗ ଜିଲ୍ଲା ଏବଂ ବରମୁଣ୍ଡା ଯୋଗ ଜିଲ୍ଲାର ମିଳିତ ଆନୁକୂଲ୍ୟରେ ମଇ ୨୭ ଓ ୨୮ ତାରିଖରେ ଅନୁଷ୍ଠିତ ଦ୍ଵିଦିବସୀୟ “ମୋଟାପା ରୋଗ ନିବାରଣ ଶିବିର”ରେ ଏ ସଂପର୍କରେ ଯୋଗାଭ୍ୟାସ ଓ ସଚେତନ କରାଯାଇଛି ।
ଆଜି ମଇ ୨୮ ତାରିଖ ସକାଳେ ସ୍ଥାନୀୟ ଭି.ଆଇ.ପି ପାର୍କ ପରିସରରେ ଅନୁଷ୍ଠିତ ହୋଇଯାଇଥିବା ଯୋଗ ଶିବିରରେ ଏକ ଶୃଙ୍ଖଳିତ ପରିବେଶ ମଧ୍ୟରେ ଦୁଇ ଯୋଗ ଜିଲ୍ଲାର ପ୍ରତ୍ୟେକ ସଦସ୍ୟ ସଦସ୍ୟା ଯୋଗ ଦେଇ ଯୋଗ ମାଧ୍ୟମରେ ସୁସ୍ଥ ଏବଂ ସୁନ୍ଦର ସ୍ୱାସ୍ଥ୍ୟ ପ୍ରତି ଜନ ସମାଜକୁ ଜାଗୃତ କରାଇବାର ଏକ ସୁନ୍ଦର ପ୍ରଚେଷ୍ଟା କରିଥିଲେ l
ମଇ ୨୭ ତାରିଖରେ ଅନୁଷ୍ଠିତ ପ୍ରଥମ ଦିନ ଯୋଗ ଶିବିର ସ୍ଥାନୀୟ ରେଣ୍ଟାଲ ପାର୍କରେ ଶୁଭାରମ୍ଭ କରାଯାଇଥିଲା । ଏଥିରେ ମୁଖ୍ୟ ଅତିଥି ଭାବେ ଓଡ଼ିଶା ପ୍ରାନ୍ତ ପ୍ରଧାନ ଶ୍ରୀ ସୁରେଶ କୁମାର ମହାପାତ୍ର ଯୋଗ ଦେଇ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ । ଏହି ଅବସରରେ ଏଠାରେ ଭାରତୀୟ ଯୋଗ ସଂସ୍ଥାନ ଦ୍ୱାରା ‘ମୋଟାପା’ ନିବାରଣ ଉପରେ ଏକ ଯୋଗ ପୁସ୍ତକ ଉନ୍ମୋଚନ କରାଯାଇଥିଲା ।
ଦୁଇ ଦିନ ବ୍ୟାପି ଅନୁଷ୍ଠିତ ଏହି କାର୍ଯ୍ୟକ୍ରମରେ ପ୍ରାନ୍ତ ସଦସ୍ୟା ଶ୍ରୀମତୀ ମଞ୍ଜୁଳା ମିଶ୍ର , ବରମୁଣ୍ଡା ଯୋଗ ଜିଲ୍ଲା ପ୍ରଧାନ ଶ୍ରୀ ପ୍ରଦୀପ୍ତ କୁମାର ମହାନ୍ତି ଏବଂ ନୟାପଲ୍ଲୀ ଯୋଗ ଜିଲ୍ଲା ପ୍ରଧାନ ଶ୍ରୀ ଜ୍ୟୋତିର୍ମୟ ରଥ ପ୍ରମୁଖ ଯୋଗ ଦେଇ ‘ମୋଟାପା’ ରୋଗ ନିବାରଣ ଉପରେ ବିଶେଷ ଆଲୋକପାତ କରିବା ସହ ନିଜ ନିଜର ଖାଦ୍ୟପେୟ, ଦିନଚର୍ଯ୍ୟା, ଶୃଙ୍ଖଳିତ ଜୀବନ ଏବଂ ଯୋଗ ମାଧ୍ୟମରେ କିପରି ଏହାକୁ ନିବାରଣ ଏବଂ ନିୟନ୍ତ୍ରଣ କରିହେବ, ସେ ସମ୍ପର୍କରେ ନିଜର ବାର୍ତ୍ତା ସୁନ୍ଦର ଭାବେ ଉପସ୍ଥାପନା କରି ମୂଲ୍ୟବାନ ପରାମର୍ଶ ଦେଇଥିଲ । ଶିବିରରେ ପ୍ରାନ୍ତ ସଦସ୍ୟା ଶ୍ରୀମତୀ ମିଶ୍ର ଙ୍କ ସମେତ ଯୋଗ ସଂସ୍ଥାନର ଅଧିକାରୀମାନେ ସମସ୍ତଙ୍କୁ ଏହି ‘ମୋଟାପା’ ରୋଗ ସମ୍ବନ୍ଧୀୟ ବିଭିନ୍ନ ଯୋଗାଭ୍ୟାସ କରାଇଥିଲେ । କାର୍ଯ୍ୟକ୍ରମରେ ଦୁଇ ଯୋଗ ଜିଲ୍ଲାର ଅଧିକାରୀ ଜୟଶ୍ରୀ ପଣ୍ଡା , ଶ୍ରୀମତୀ ଜ୍ୟୋତିର୍ମୟୀ ମହାପାତ୍ର ଏବଂ ଶ୍ରୀମତୀ ମମତା ଦାଶ ଙ୍କ ସମେତ କ୍ଷେତ୍ର, କେନ୍ଦ୍ର ଅଧିକାରୀ ଏବଂ ସାଧକ, ସାଧିକା ଙ୍କ ସହ ମୋଟ ୧୫୦ ଜଣ ସଦସ୍ୟ ସଦସ୍ୟା ଉପସ୍ଥିତ ଥିଲେ । ପ୍ରଥମ ଦିନ କାର୍ଯ୍ୟକ୍ରମକୁ ଶ୍ରୀମତୀ ଶୁଭ୍ରସିମା ମହାନ୍ତି ଏବଂ ଦ୍ଵିତୀୟ ଦିବସକୁ ଡକ୍ଟର ଜ୍ୟୋତିର୍ମୟୀ ଦାସ ସଞ୍ଚାଳକ ଦାୟିତ୍ୱ ନିର୍ବାହ କରିଥିଲେ l
