ବିଏମ୍ ସିର ସ୍ୱଚ୍ଛ ସର୍ବେକ୍ଷଣ ଅଭିଯାନ
ଭୁବନେଶ୍ୱର;: ସ୍ୱଚ୍ଛ ସର୍ବେକ୍ଷଣ ପାଇଁ ଭୁବନେଶ୍ୱର ମହାନଗର ନିଗମର କାର୍ଯ୍ୟକ୍ରମ ଜାରି ରଖିଛି । ଏହି କ୍ରମରେ ବିଏମ୍ ସି ଅଂଚଳରେ ବିଭିନ୍ନ ଆବାସିକ ସଂଗଠନଗୁଡିକୁ ପରିମଳ କାର୍ଯ୍ୟରେ ସହଭାଗିତା ପାଇଁ ପ୍ରୟାସ ଜାରି ରହିଛି । ବିଏମ୍ ସି ଅନୁବନ୍ଧିତ ଶହ ଶହ ଆବାସିକ ସଂଗଠନ ମଧ୍ୟ ନିଜ ନିଜ ଅଂଚଳରେ ସ୍ୱଚ୍ଛତା ରକ୍ଷା ପାଇଁ ସେମାନଙ୍କର ପ୍ରୟାସ ଜାରି ରଖିଛନ୍ତି । ଆବାସିକ ସଂଗଠନଗୁଡିକୁ ସକ୍ରିୟ ରଖିବା ସହ ସେମାନଙ୍କୁ ବିଭିନ୍ନ କାର୍ଯ୍ୟକ୍ରମରେ ସାମିଲ କରିବା ପାଇଁ ସ୍ୱେଚ୍ଛାସେବୀ ସଂଗଠନ ଫିଡ୍ ବ୍ୟାକ୍ ଫାଉଣ୍ଡେସନ, ବିକାଶ ଏବଂ ବେସିକ୍ସ ମ୍ୟୁନିସପାଲ ଓ୍ୱେଷ୍ଟ ଭେନ୍ଚର ସେମାନଙ୍କର ଆଇଇସି କାର୍ଯ୍ୟକ୍ରମ ଜାରି ରଖିଛନ୍ତି । ବେସିକ୍ସ 173 ଆବାସିକ ସଂଗଠନରେ ଆଇଇସି କାର୍ଯ୍ୟକ୍ରମ କରିବା ସହ ଏହାର ସଦସ୍ୟ ସଦସ୍ୟାଙ୍କୁ ସଚେତନ କରାଉଛି । ସେମାନେ ନିଜ ନିଜ ଅଂଚଳ ତଥା ପରିବେଶକୁ କିପରି ସ୍ୱଚ୍ଛ, ସବୁଜ ଓ ସୁନ୍ଦର ରଖିବେ, ଲୋକମାନେ ସମସ୍ତେ କିପରି ନିଜ ଘରୁ ବର୍ଜ୍ୟକୁ ଅଲଗା ଅଲଗା କରି ଦେବେ । ଏଣିକି ଓଦା, ସୁଖିଲା, ସାନିଟାରୀ ନାପକିନ୍ ଓ ବିପଦପୂର୍ଣ୍ଣ ଇଲେକ୍ଟ୍ରୋନିକ୍ସ ବର୍ଜ୍ୟକୁ ଅଲଗା ଅଲଗା 4ଟି ଡଷ୍ଟବିନରେ ରଖିବାକୁ ପଡିବ ।
ଆମ ଘର ବା ଆପାର୍ଟମେଣ୍ଟର ଚାରିପାଖରେ ବୃକ୍ଷ ରୋପଣ କରିବା ଆଦି ସଂପର୍କରେ ସଚେତନ କରାଉଛନ୍ତି । ଆବାସିକ ସଂଗଠନର କର୍ମକର୍ତ୍ତା, ସଦସ୍ୟ, ସଦସ୍ୟା, ଆପାର୍ଟମେଣ୍ଟ ବାସିନ୍ଦା ଆଦି ସମସ୍ତେ ଯେପରି ସ୍ୱଚ୍ଛତା ବଜାୟ ରଖିବା ପାଇଁ ବିଏମ୍ ସିକୁ ସହାୟତାର ହାତ ବଢାଇବେ, ସହଯୋଗ କରିବେ ଏବଂ ସେହିମାନଙ୍କ ସହଭାଗିତାରେ ସହରକୁ ସ୍ୱଚ୍ଛ, ସବୁଜ ସୁନ୍ଦର କରିବା ପାଇଁ ପ୍ରୟାସ ଜାରି ରଖିଛି ବିଏମ୍ ସି । ସେହିପରି ଫିଡ୍ ବ୍ୟାକ୍ 250 ଗୋଟି ଆବାସିକ ସଂଗଠନ ଏବଂ ବିକାଶ 216 ଗୋଟି ଆବାସିକ ସଂଗଠନର ଦାୟିତ୍ୱ ନେଇଛନ୍ତି । ମୋଟ 639 ଗୋଟି ଆବାସିକ ସଂଗଠନର ପାଖାପାଖି 6 ହଜାର ସଦସ୍ୟ ସଦସ୍ୟା ସେମାନଙ୍କର ପରିବେଶକୁ ସ୍ୱଚ୍ଛ ରଖିବା ପାଇଁ କାର୍ଯ୍ୟକରୁଛନ୍ତି । ଇତି ମଧ୍ୟରେ ଶତକଡା 60 ରୁ ଅଧିକ ପ୍ରତିଶତ ଆବାସିକ ସଂଗଠନକୁ ସଚେତନ କରାଯାଇଛି । ସ୍ୱେଚ୍ଛାସେବୀ ସଂଗଠନଗୁଡ଼ିକ ନିଜ ନିଜର କାର୍ଯ୍ୟଧାରାକୁ ତ୍ୱରାନ୍ୱିତ କରିଛନ୍ତି । ଭୁବନେଶ୍ୱରର ପରିମଳ ବ୍ୟବସ୍ଥାରେ ସୁଧାର ଆଣିବା ସହ ଭୁବନେଶ୍ୱରକୁ ସ୍ୱଚ୍ଛ, ସବୁଜ, ସୁନ୍ଦର ସହର ଭାବେ ଗଢିତୋଳିବାକୁ ପ୍ରତ୍ୟେକ ଆବାସିକ ସଂଗଠନର ସଦସ୍ୟ, ସଦସ୍ୟା ଓ କର୍ମକର୍ତ୍ତାମାନେ ଶପଥ ନେଇଛନ୍ତି ।
ସ୍ୱଚ୍ଛତା ପରିଚାଳନା ପାଇଁ ଆବସିକ ଅଂଚଳ ସହ ପାର୍କ ଓ ବଗିଚାଗୁଡିକରେ ଦୈନିକ ଥରେ ଏବଂ ସେ ଅଂଚଳରେ ଥିବା ବ୍ୟବସାୟିକ ଅଂଚଳ, ସର୍ବସାଧାରଣଙ୍କ ସମାଗମ ସ୍ଥାନ, ଟ୍ରାନ୍ସପୋର୍ଟ ହବ୍, ପର୍ଯ୍ୟଟନସ୍ଥଳ, ଖାଓଗଳି, ଐତିହସ୍ଥଳ ଆଦିରେ ଦିନକୁ ଦୁଇଥର ଲେଖାଏଁ ସଫା କରାଯାଉଛି । ଏହି ପ୍ରକ୍ରିୟା ବର୍ଷ ବ୍ୟାପି ଜାରି ରଖିବାକୁ ଯୋଜନା କରାଯାଉଛି ।
