ଗୋଖାଦ୍ୟ ଗାଡ଼ିରେ ଯାଉଥିଲା ଗଞ୍ଜେଇ, 2 କୁଇଣ୍ଟାଲ 10 କେଜି ଗଞ୍ଜେଇ ଗାଡି ଜବତ ସହ ଦୁଇ ଅଭିଯୁକ୍ତ ଗିରଫ l

ସୁବର୍ଣ୍ଣପୁର –ସୋନପୁର ପୋଲିସକୁ ମିଳିଛି ବଡ଼ ସଫଳତା। ୨ କୁଇଣ୍ଟାଲ ୧୦ କେଜି ଗଞ୍ଜେଇ ଜବତ ହେବା ସହ ଦୁଇ ଅଭିଯୁକ୍ତ ଗିରଫ କରିଛି l ଏଥିସହ ବ୍ୟବହୃତ ଗାଡି କୁ ଜବତ କରିଛି ସୋନପୁର ପୋଲିସ l ପଡ଼ୋଶୀ ବୌଦ୍ଧ ଜିଲ୍ଲାରୁ ଇଚର୍ ଟ୍ରକ ଯୋଗେ ଦିଲ୍ଲୀକୁ ଗଞ୍ଜେଇ ଚାଲାଣ ବେଳେ ତେଲ ନଦୀ ପୋଲ ନିକଟରେ ଧରିଲା ପୋଲିସ । ଗୋଖାଦ୍ୟ ନେଉଥିବା ଟ୍ରକରେ ଯାଉଥିଲା ଗଞ୍ଜେଇ । ଗଞ୍ଜେଇର ଆନୁମାନିକ ମୂଲ୍ୟ ୨୦ ଲକ୍ଷରୁ ଉର୍ଦ୍ଧ୍ବ ହେବ ବୋଲି ଜଣାପଡିଛି ।

ଏ ନେଇ ଆଜି ସୋନପୁର ଥାନା ରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ସୁବର୍ଣ୍ଣପୁର ଆରକ୍ଷୀ ଅଧିକ୍ଷକ ରାମ ପ୍ରସାଦ ସାହୁ । ସୂଚନା ଅନୁସାରେ ବୌଦ୍ଧ ଜିଲ୍ଲାର କଣ୍ଟାମାଳ ଥାନା ଅଞ୍ଚଳରୁ ଏକ ଇଚର ଟ୍ରକ( ନମ୍ବର -HR -63 F 9333) ରେ ଗୋଖାଦ୍ୟ ନେଇଯାଉଥିବାବେଳେ ସେଥିରେ କୋରିଅର ପ୍ୟାକେଟରେ ଗଞ୍ଜେଇ ଭର୍ତ୍ତି କରି ନେଇ ଯାଉଥିବା ସୋନପୁର ପୋଲିସ ଖବର ପାଇଥିଲା । ଗାଡ଼ିକୁ ତେଳନଦୀ ସେତୁ ନିକଟରେ ଅଟକାଇବା ସହ ଯାଞ୍ଚ କଲାବେଳେ ସେଥିରେ ଥିବା ଗଞ୍ଜେଇ ଧରିଥିଲା ପୋଲିସ । ଘଟଣାରେ ଦୁଇ ଜଣ ଅଭିଯୁକ୍ତକୁ ଗିରଫ କରିଛି ସୋନପୁର ପୋଲିସ । ଅଭିଯୁକ୍ତ ଦ୍ବୟ ହରିୟlଣା ରାଜ୍ୟର ସତିଶ ଓ ଦେବେନ୍ଦର୍ ।

ତେବେ ଟ୍ରକକୁ ଜବତ କରିବା ସହିତ ଉଭୟଙ୍କୁ ଆଜି କୋର୍ଟ ଚାଲାଣ କରାଯିବ ବୋଲି ସୂଚନା ଦେଇଛନ୍ତି ଆରକ୍ଷୀ ଅଧିକ୍ଷକ। ତା ସହିତ ଚଳିତ ମାସରେ ମୋଟ ୮ ଟି ମାମଲା NDPS ଆକ୍ଟ ଅନୁଯାୟୀ ସୋନପୁର ଥାନାରେ ହୋଇଥିବା ବେଳେ ଗଞ୍ଜେଇ ଓ କଫ ସିରଫ ଜବତ ହୋଇଥିବା ସୂଚନା ଦେଇଛନ୍ତି ଆରକ୍ଷୀ ଅଧିକ୍ଷକ l

ରିପୋର୍ଟ – ଉଗ୍ରସେନ କର୍ମୀ, ସୁବର୍ଣ୍ଣପୁର