ବତ୍ରିଶ ସିଂହାସନ ବରିଷ୍ଠ ନାଗରିକ ମଞ୍ଚ’ ପକ୍ଷରୁ ୯୧ତମ ଉତ୍କଳ ଦିବସ ପାଳିତ: ଓଡ଼ିଆ ଅସ୍ମିତା ଓ ଭାଷା ସୁରକ୍ଷାର ସଂକଳ୍ପ

ଭୁବନେଶ୍ୱର (ଭୀମଟାଙ୍ଗୀ): ଓଡ଼ିଶା ଗଠନର ସ୍ଵର୍ଣ୍ଣିମ ଇତିହାସକୁ ସ୍ମରଣ କରି ଭୀମଟାଙ୍ଗୀସ୍ଥିତ ‘ବତ୍ରିଶ ସିଂହାସନ ବରିଷ୍ଠ ନାଗରିକ ମଞ୍ଚ’ ପକ୍ଷରୁ ୯୧ତମ ଉତ୍କଳ ଦିବସ ମହାସମାରୋହରେ ପାଳିତ ହୋଇଯାଇଛି। ଆଜି ପୂର୍ବାହ୍ନରେ ୧୦ ଘଟିକା ସମୟରେ ମଞ୍ଚର ଡେ-କେୟାର ସେଣ୍ଟର ଗୃହରେ ଆୟୋଜିତ ଏହି ଭବ୍ୟ ଉତ୍ସବରେ ମଞ୍ଚର ସଭାପତି ଶ୍ରୀ ଗଣେଶ କୁମାର ପ୍ରଧାନ ସଭାପତିତ୍ବ କରିଥିଲେ।
କାର୍ଯ୍ୟକ୍ରମର ପ୍ରାରମ୍ଭରେ ସମୂହ ଦୀପ ପ୍ରଜ୍ବଳନ ପରେ ଶ୍ରୀମତୀ ସଙ୍ଗୀତା ଷଡ଼ଙ୍ଗୀ, ସଞ୍ଜୁକ୍ତା ଗୁରୁ, ମାମା ସାହୁ, ଉପେନ୍ଦ୍ର ବେହେରା ଓ କାମଦେବ ରଣସିଂହଙ୍କ ଦ୍ୱାରା ‘ବନ୍ଦେ ଉତ୍କଳ ଜନନୀ’ ଗାନ କରାଯାଇ ଏକ ଦେଶାତ୍ମବୋଧକ ପରିବେଶ ସୃଷ୍ଟି କରାଯାଇଥିଲା।
ଏହି ଅବସରରେ ପ୍ରାକ୍ତନ ଡିପିଆଇ ଶ୍ରୀ କମଳା ପ୍ରସାଦ ମହାପାତ୍ର ମୁଖ୍ୟ ଅତିଥି ଭାବେ ଯୋଗଦେଇ ଓଡ଼ିଶାର ଗୌରବମୟ ଇତିହାସ ଉପରେ ଆଲୋକପାତ କରିଥିଲେ। ସମ୍ମାନିତ ଅତିଥି ଭାବେ ସ୍ଥାନୀୟ କର୍ପୋରେଟର ଶ୍ରୀ ଶିବ ନାରାୟଣ ରାୟ ଏବଂ ମୁଖ୍ୟବକ୍ତା ଭାବେ ଇଣ୍ଡିଆନ୍ ବ୍ୟାଙ୍କର ପୂର୍ବତନ ବରିଷ୍ଠ ପ୍ରବନ୍ଧକ ଶ୍ରୀ କ୍ଷୀରସିନ୍ଧୁ ସେଠୀ ଯୋଗଦେଇ ଓଡ଼ିଆ ଭାଷା ଓ ଅସ୍ମିତାର ସୁରକ୍ଷା ଉପରେ ଗୁରୁତ୍ୱାରୋପ କରିଥିଲେ। ଅନ୍ୟତମ ବିଶିଷ୍ଟ ବକ୍ତା ଭାବେ ପ୍ରାକ୍ତନ ଅଧ୍ୟକ୍ଷ ଶ୍ରୀ ରାଜେନ୍ଦ୍ର କୁମାର ନରେନ୍ଦ୍ର ସିଂ ବର୍ମା, ଅବସରପ୍ରାପ୍ତ ବରିଷ୍ଠ ପ୍ରଶାସକ ଶ୍ରୀ କାଶୀନାଥ ସାହୁ ଓ ଶ୍ରୀ କୃଷ୍ଣଚନ୍ଦ୍ର ବଡୁ ଉତ୍କଳ ଦିବସ ପାଳନର ପ୍ରାସଙ୍ଗିକତା ସମ୍ପର୍କରେ ମତବ୍ୟକ୍ତ କରିଥିଲେ।ସଭାରେ ବକ୍ତାମାନେ ପାଞ୍ଚୋଟି ମୁଖ୍ୟ ବିନ୍ଦୁ ଉପରେ ଗୁରୁତ୍ୱ ଦେଇଥିଲେ:
* ଭାଷା ଓ ଅସ୍ମିତା: ବିଶ୍ୱାୟନ ସମୟରେ ମାତୃଭାଷାକୁ ବଞ୍ଚାଇ ରଖିବା ପ୍ରତ୍ୟେକ ଓଡ଼ିଆଙ୍କ କର୍ତ୍ତବ୍ୟ।
* ପୂର୍ବଜଙ୍କୁ ଶ୍ରଦ୍ଧାଞ୍ଜଳି: ମଧୁବାବୁ, ଗୋପବନ୍ଧୁ, ଶ୍ରୀରାମଚନ୍ଦ୍ର ଭଞ୍ଜଦେଓ ଓ କୃଷ୍ଣଚନ୍ଦ୍ର ଗଜପତିଙ୍କ ତ୍ୟାଗକୁ ସ୍ମରଣ କରିବା।
* ଏକତା: ସମଗ୍ର ଓଡ଼ିଆ ଜାତିକୁ ଏକ ସୂତ୍ରରେ ବାନ୍ଧି ରଖିବା।
* ପ୍ରେରଣା: ଆଗାମୀ ପିଢ଼ି ମଧ୍ୟରେ ଓଡ଼ିଆ ଅସ୍ମିତା ଜାଗ୍ରତ କରିବା।
* ବିକାଶର ସମୀକ୍ଷା: ରାଜ୍ୟର ପ୍ରଗତି ପାଇଁ ସମସ୍ତେ ସଂକଳ୍ପବଦ୍ଧ ହେବା।
ଉତ୍ସବରେ ଶ୍ରୀ ବଂଶୀଧର ପଣ୍ଡା, ସୁଶ୍ରୀ କୃଷ୍ଣ ପ୍ରିୟା ଦାସ ଓ ବାଇଧର ପାତ୍ର ନିଜ ବକ୍ତବ୍ୟରେ ଉତ୍କଳ ଦିବସକୁ ସ୍ୱାଭିମାନର ପର୍ବ ଭାବେ ଅଭିହିତ କରିଥିଲେ। ମଞ୍ଚର ସମ୍ପାଦକ ଶ୍ରୀ କାମଦେବ ରଣସିଂହ ନିଜର ସ୍ୱରଚିତ କବିତା ପାଠ କରି ସମସ୍ତଙ୍କୁ ମନ୍ତ୍ରମୁଗ୍ଧ କରିଥିଲେ। ଶ୍ରୀ ପଦ୍ମନାଭ ଷଡ଼ଙ୍ଗୀ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।

କାର୍ଯ୍ୟକ୍ରମ ପରିଚାଳନାରେ ଶ୍ରୀ ଶଙ୍କର ସାହୁ, ସୁଧାଂଶୁ ଶେଖର ହରିଚନ୍ଦନ, ଡଃ ନୀତି ରଞ୍ଜନ ଚାନ୍ଦ, ଗଉରହରି ପଣ୍ଡା, ବସନ୍ତ କୁମାର ନାୟକ, ବିଷ୍ଣୁ ଚରଣ ପ୍ରଧାନ, ଶଙ୍କର ମହାପାତ୍ର, ମାନସ ରଞ୍ଜନ ପଟ୍ଟନାୟକ, ରବିନିରାୟଣ ଦାଶ, ପ୍ରତାପ ମିଶ୍ର , ମହାଦେବ ଗରାବଡୁ, ବନବିହାରୀ ରଥ, ସିତାଂଶୁ ଶେଖର ବାବୁ, ବିଶ୍ୱନାଥ ବେହେରା, କଳ୍ପତରୁ ସାମନ୍ତରାୟ, ହୃଦାନନ୍ଦ ଦାସ, ଶରତ ସାମନ୍ତରାୟ, ଖିରୋଦ ଚନ୍ଦ୍ର ସାହୁ, ଲୋକନାଥ ମିଶ୍ର ଓ ସୁରେନ୍ଦ୍ର ମହାଳିକ ସକ୍ରିୟ ସହଯୋଗ କରିଥିଲେ। ଜାତୀୟ ସଙ୍ଗୀତ ଗାନ ପରେ ସଭା ସାଙ୍ଗ ହୋଇଥିଲା ଏବଂ ସମସ୍ତେ ମଧ୍ୟାହ୍ନ ପଙ୍କ୍ତି ଭୋଜନରେ ସାମିଲ ହୋଇଥିଲେ।