ଶ୍ରମିକ ନେତା ପ୍ରଭାତ ସାମନ୍ତରାୟଙ୍କ ବିୟୋଗରେ ପାରାଦୀପ ନଗର ବିଜେଡି ପକ୍ଷରୁ ଶୋକସଭା
ପାରାଦୀପ, ୨୦/୧୦ : ପାରାଦୀପର ବିଶିଷ୍ଟ ଶ୍ରମିକ ନେତା ତଥା ପୂର୍ବତନ ସାଂସଦ ପ୍ରଭାତ କୁମାର ସାମନ୍ତରାୟଙ୍କ ବିୟୋଗରେ ପାରାଦୀପ ନଗର ବିଜୁ ଜନତା ଦଳ ପକ୍ଷରୁ ଏକ ଶୋକ ସଭା ରବିବାର ଦିନ ଅପରାହ୍ନରେ ଆୟୋଜିତ ହୋଇଥିଲା । ପାରାଦୀପ ମଧୁବନସ୍ଥିତ ଶ୍ରମିକ ଭବନ ପରିସରରେ ଆୟୋଜିତ ଏହି ଶୋକସଭାରେ ପୌରହିତ୍ୟ କରିଥିଲେ ନଗର ବିଜେଡି ସଭାପତି ତଥା ପାରାଦୀପର ନଗରପାଳ ବସନ୍ତ ବିଶ୍ୱାଳ । କାର୍ଯ୍ୟକ୍ରମକୁ ସଂଯୋଜନା କରିଥିଲେ ନଗର ବିଜେଡି ସାଧାରଣ ସମ୍ପାଦକ ଶଙ୍କର ପ୍ରସାଦ ରାଉତ । କାର୍ଯ୍ୟକ୍ରମରେ ପାରିଷଦ ସୁଶାନ୍ତ ଦାସ, ଅଜିତ କୁମାର ଷଡଙ୍ଗୀ, ସ୍ୱପ୍ନାରାଣୀ ଜେନା, ବରିଷ୍ଠ ବିଜେଡି ନେତା ଉଲ୍ଲାସ ବିଶ୍ୱାଳ, ଗୋଲକ ସାହୁ, ପୂର୍ବତନ ପାରିଷଦ ଚପଳା ସ୍ୱାଇଁ ପ୍ରମୁଖ ଯୋଗ ଦେଇଥିଲେ । ଉତ୍କଳ ପୋର୍ଟ ଆଣ୍ଡ ଡକ୍ ଓାର୍କସ୍ ୟୁନିୟନର ସାଧାରଣ ସମ୍ପାଦକ ବିଭୁଦେନ୍ଦ୍ର ନାରାୟଣ ମହାରଣା, ସାମ୍ବାଦିକ ବିଶ୍ୱନାଥ ବଳ ପ୍ରମୂଖ ଯୋଗ ଦେଇ ସ୍ୱର୍ଗତ ସାମନ୍ତରାୟଙ୍କ ଜୀବନୀ ସମ୍ପର୍କରେ ଆଲୋକପାତ କରିଥିଲେ । ସ୍ୱର୍ଗତ ସାମନ୍ତରାୟ କେନ୍ଦ୍ରାପଡାରୁ ଦୁଇଥର ସାଂସଦ ଭାବେ ନିର୍ବାଚିତ ହେବା ସହ ଥରେ ରାଜ୍ୟସଭା ସାଂସଦ ଭାବେ ଦାୟିତ୍ୱ ନିର୍ବାହ କରିବା ସହିତ ଉତ୍କଳ ପୋର୍ଟ ଆଣ୍ଡ ଡକ୍ ଓାର୍କସ୍ ୟୁନିୟନର ସଭାପତି ଥିଲେ । ଜନତା ଦଳ ଓ ବିଜୁ ଜନତା ଦଳର ସେ ସକ୍ରିୟ ଭାବେ କାର୍ଯ୍ୟ କରିଥିଲେ । ତାଙ୍କ ବିୟୋଗରେ ଅନୁଷ୍ଠିତ ଏହି ଶୋକସଭାରେ ବିଜୁ ଜନତା ଦଳର କର୍ମୀ ଓ ନେତାମାନେ ଯୋଗ ଦେଇ ସ୍ୱର୍ଗତ ସାମନ୍ତରାୟଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।
