ଜେଏସଡବ୍ଲ୍ୟୁ ସମର୍ଥ ଯୁବ ବିକାଶ କେନ୍ଦ୍ର ଶିକ୍ଷିତ ଯୁବ ଗୋଷ୍ଠୀ ପାଇଁ ରୋଜଗାରର ମାଧ୍ୟମ

ପାରାଦୀପ: ଜଗତସିଂହପୁର ଜିଲ୍ଲା ପ୍ରଶାସନ ସହଯୋଗରେ ନୂଆଗାଁର ଏକ ବନ୍ଦ ରହିଥିବା ପ୍ରାଥମିକ ବିଦ୍ୟାଳୟକୁ ଜେଏସଡବ୍ଲ୍ୟୁକୁ ପୂର୍ଵରୁ ପ୍ରଦାନ କରାଯାଇଥିଲା । ସେଠାରେ ଜେଏସଡବ୍ଲ୍ୟୁ ସମର୍ଥ ଯୁବ ବିକାଶ କେନ୍ଦ୍ର ଓ ଗୁରୁକୂଳ ଫାଉଣ୍ଡେସନ୍ ମିଳିତ ସହଭାଗିତାରେ ଶିକ୍ଷିତ ଯୁବକ-ଯୁବତୀମାନଙ୍କୁ ରାଜ୍ୟ ଓ କେନ୍ଦ୍ର ସରକାରୀ ସଂସ୍ଥା ଦ୍ୱାରା ପରିଚାଳିତ ବିଭିନ୍ନ ପ୍ରତିଯୋଗିତା ମୂଳକ ପରୀକ୍ଷା ପାଇଁ ପ୍ରସ୍ତୁତି, କମ୍ପ୍ୟୁଟର ଶିକ୍ଷା, ପ୍ରାକ୍ଟିସ୍ ଟେଷ୍ଟ ଏବଂ ବ୍ୟକ୍ତିତ୍ୱ ବିକାଶ ପ୍ରଶିକ୍ଷଣ ଦିଆଯାଉଛି।

ପ୍ରତ୍ୟେକ ଛଅ ମାସର ବ୍ୟାଚରେ ସର୍ବାଧିକ ଷାଠିଏ ଜଣ ପ୍ରାର୍ଥୀ ଅଂଶଗ୍ରହଣ କରନ୍ତି।ଏହି କେନ୍ଦ୍ରରେ ଗ୍ରାମୀଣମାନଙ୍କୁ ସମ୍ପୂର୍ଣ୍ଣ ନିଶୁଳ୍କ କୋଚିଂ ଦିଆଯାଉଛି, ଯାହା ସହର ସ୍ତରର ସୁବିଧା ସହିତ ସମାନ କହିଲେ ଅତ୍ୟୁକ୍ତି ହେବନାହିଁ। କ୍ଲାସ୍ରୁରୁମ୍ ପାଠପଢା, ପାଠ୍ୟସାମଗ୍ରୀ, ମକ୍ ଟେଷ୍ଟ, କମ୍ପ୍ୟୁଟର ସୁବିଧା, ଏକାଡେମିକ୍ ମେଣ୍ଟରିଂ ଏବଂ ସଂଗଠିତ ମାର୍ଗଦର୍ଶନ ଯୋଗାଯାଉଛି। ବ୍ୟକ୍ତିତ୍ୱ ବିକାଶ, ଯୋଗାଯୋଗ କୌଶଳ, ଆତ୍ମବିଶ୍ୱାସ ବୃଦ୍ଧି ଏବଂ ଭାଇଭା-ଭେସ/ଇଣ୍ଟରଭ୍ୟୁ ପ୍ରସ୍ତୁତି ଉପରେ ବିଶେଷ ଗୁରୁତ୍ୱ ଦିଆଯାଉଛି। ବର୍ତ୍ତମାନ ପାଞ୍ଚମ ବ୍ୟାଚ୍ ଚାଲୁଛି। ଗତ ଦୁଇ ବର୍ଷରେ ପ୍ରାୟ ୩୦୦ରୁ ଅଧିକ ଛାତ୍ରଛାତ୍ରୀ ଏହି ପ୍ରକଳ୍ପରୁ ଲାଭାନ୍ୱିତ ହୋଇଛନ୍ତି। ୨୧ ଜଣ ସରକାରୀ ପରୀକ୍ଷାରେ ସଫଳ ହୋଇଛନ୍ତି, ତାଙ୍କ ମଧ୍ୟରୁ ତିନି ଜଣ ବିଭିନ୍ନ ସରକାରୀ ସଂସ୍ଥାରେ କାର୍ଯ୍ୟରତ, ଯାହାରେ ଗଡକୁଜାଙ୍ଗାର ଜଣେ ଛାତ୍ର ଓପିଏସସି ମାଧ୍ୟମରେ ଓଡିଶା ସିଭିଲ ସର୍ଭିସ୍ ରେ ଚୟନିତ ହୋଇଛନ୍ତି। କେନ୍ଦ୍ରର ୨ ଜଣ ଶିକ୍ଷକ ମଧ୍ୟ ଓଡିଶା ସିଭିଲ ସର୍ଭିସ୍ ଉତ୍ତୀର୍ଣ୍ଣ ହୋଇ ବର୍ତ୍ତମାନ ପ୍ରୋବେସନରେ ଅଛନ୍ତି। ୭୦ରୁ ଅଧିକ ଛାତ୍ର ଓଡ଼ିଶା ଏବଂ ବାହାରେ ନିଯୁକ୍ତି ପାଇଛନ୍ତି।

ଜେଏସଡବ୍ଲ୍ୟୁ ଫାଉଣ୍ଡେସନ ବ୍ୟାଚ୍ ସମାପ୍ତି ପରେ ମଧ୍ୟ ଛାତ୍ରମାନଙ୍କ ଅଗ୍ରଗତି ଉପରେ ନିୟମିତ ଦୃଷ୍ଟି ରଖୁଛି। ସ୍ୱୟଂଅଧ୍ୟୟନ ପାଇଁ କେନ୍ଦ୍ରର ଲାଇବ୍ରେରୀ ବ୍ୟବହାରକୁ ପ୍ରୋତ୍ସାହନ ଦିଆଯାଉଛି।ଆରମ୍ଭରେ କେବଳ ISP DIZ ଗାଁଗୁଡିକରୁ ଭର୍ତ୍ତି ହେଉଥିଲେ ମଧ୍ୟ, ବର୍ତ୍ତମାନ IIZ ଅଞ୍ଚଳରୁ ମଧ୍ୟ ଛାତ୍ରଛାତ୍ରୀ ଆସୁଛନ୍ତି। ବର୍ତ୍ତମାନ ପ୍ରାୟ ୨୫% ଛାତ୍ର ୧୫ କି.ମି. ଦୂରରୁ ଆସୁଛନ୍ତି, କେହି ୪୫ କି.ମି. ଦୂରରୁ ନୁଆଗାଁରେ ରହି ପଢୁଛନ୍ତି। ଏହି କେନ୍ଦ୍ର ମହିଳା ଛାତ୍ରୀମାନଙ୍କ ପାଇଁ ବିଶେଷ ଉପକାରୀ ହୋଇଛି। ପ୍ରତ୍ୟେକ ବ୍ୟାଚରେ ୬୫–୭୦% ଝିଅ ଛାତ୍ରୀ ଅଛନ୍ତି। ଏହା ସମୁଦାୟର ମନୋଭାବରେ ପରିବର୍ତ୍ତନକୁ ପ୍ରତିଫଳିତ କରେ। ଦୂରଦୂରାନ୍ତରୁ ଆସୁଥିବା ଛାତ୍ରମାନେ ଭଡାଘରେ ରହିବାରୁ ସ୍ଥାନୀୟ ଲୋକଙ୍କ ଆୟ ବୃଦ୍ଧି ହେଉଛି, ଦୋକାନ ଓ ସେବା ପ୍ରଦାନକାରୀମାନେ ମଧ୍ୟ ଲାଭାନ୍ୱିତ ହେଉଛନ୍ତି। ନୁଆଗାଁର ସଫଳତାରୁ ପ୍ରେରିତ ହୋଇ ପାରାଦୀପ ଓ ଜଗତସିଂହପୁର ଜିଲ୍ଲାର ଅନ୍ୟାନ୍ୟ ବଡ଼ କମ୍ପାନୀମାନେ ଏପରି ନିଶୁଳ୍କ ପ୍ରଶିକ୍ଷଣ କାର୍ଯ୍ୟକ୍ରମ ଆରମ୍ଭ କରୁଛନ୍ତି। ସମର୍ଥ ଯୁବ ବିକାଶ କେନ୍ଦ୍ରକୁ ଜେଏସଡବ୍ଲ୍ୟୁ ଫାଉଣ୍ଡେସନ ସାମାଜିକ ବିକାଶ ଦାୟିତ୍ୱବୋଧର ଅଂଶ ଭାବେ କାର୍ଯ୍ୟକରୁଥିବା ନେଇ ସୂଚନା ମିଳିଛି ।

ପାରାଦୀପ ଇପିଏ ରୁ ପ୍ରଶାନ୍ତ ଦାଶ ଙ୍କ ରିପୋର୍ଟ
ଇପିଏ ନିଉଜ ( ଇଷ୍ଟର୍ଣ୍ଣ ପ୍ରେସ ଏଜେନ୍ସି )