ଟିଟିଲାଗଡରୁ ହରିଶଙ୍କରକୁ ବସ ସେବା ଆରମ୍ଭ
ଟିଟିଲାଗଡ: ଟିଟିଲାଗଡର ଐତିହ୍ୟ ସମ୍ପନ୍ନ ପୌରାଣିକ ତୀର୍ଥ କ୍ଷେତ୍ର ହରିଶଙ୍କର କୁ ବସ୍ ସେବା ଆରମ୍ଭ ହୋଇଛି। ସ୍ଥାନୀୟ ବିଧାୟକ ନବୀନ ଜୈନଙ୍କ ଉଦ୍ୟମରେ ରାଜ୍ୟ ସରକାର ସ୍ୱଳ୍ପ ମୂଲ୍ୟରେ ବସ ସେବା ଆରମ୍ଭ କରି ସହରବାସୀଙ୍କୁ ଭେଟି ଦେଇଛନ୍ତି।
ନୂତନ ବସଷ୍ଟାଣ୍ଡ ପରିସରରୁ ବିଧାୟକ ଶ୍ରୀ ଜୈନ ଓ ପୌରାଧ୍ୟକ୍ଷା ମମତା ଦେବୀ ଜୈନ ସବୁଜ ପତାକା ଦେଖାଇ ଏହି ସେବାର ଶୁଭ ଉଦ୍ଘାଟନ କରିଥିଲେ।
ସୂଚନା ଅନୁଯାୟୀ ବସ୍ଟି ଦୈନିକ ସକାଳ ୬ ଘଣ୍ଟାରେ ଟିଟିଳାଗଡରୁ ବେଲଗାଁ, ସଇଁତଳା, କୁମ୍ଭାରୀ, ଟିକ୍ରାପଡା, ଧୁମାଭଟ୍ଟା, ପାଟଣାଗଡ,ଯୋଗିମୁଣ୍ଡା, ଖପ୍ରାଖୋଲ ଦେଇ ହରିଶଙ୍କରରେ ପହଞ୍ଚିବ। ସେହିପରି ହରିଶଙ୍କରରୁ ୩ ଟା ୧୦ରେ ବାହାରି ଅନୁରୂପ ଭାବରେ ଟିଟିଲାଗଡ ଫେରିବ। ଟିଟିଲାଗଡରୁ ହରିଶଙ୍କର ଯାତ୍ରା ମଧ୍ୟରେ ସମୁଦାୟ ୨୦ଟି ଷ୍ଟପେଜ୍ ନିର୍ଦ୍ଧାରିତ କରାଯାଇଛି।
ଏହି ବସ୍ ଯାତ୍ରାରେ ପୁରୁଷ ଯାତ୍ରୀଙ୍କ ପାଇଁ ୧୦୦ଟଙ୍କା ଟିକେଟ୍, ଓ ମହିଳାଙ୍କ ପାଇଁ ୫୦ଟଙ୍କା କରାଯାଇଛି। ବିଧାୟକ ଶ୍ରୀ ଜୈନ ପୂଜାର୍ଚ୍ଚନା କରିସାରିବା ପରେ ନିଜେ କିଛି ସମୟ ବସ୍ ବସ ଚଳାଇ ଲୋକମାନଙ୍କୁ ଉତ୍ସାହିତ କରିଥିଲେ। ଏହି ବସ୍ ସେବାକୁ ନେଇ ଜନସାଧାରଣଙ୍କ ମନରେ ଆନନ୍ଦର ଉଲ୍ଳାସ ଦେଖିବାକୁ ମିଳଥିବାବେଳେ ବିଧାୟକ ଟିଟିଲାଗଡ ନିର୍ବାଚନ ମଣ୍ଡଳୀ ବାସୀଙ୍କ ପକ୍ଷରୁ ମୁଖ୍ୟମନ୍ତ୍ରୀ ମୋହନ ମାଝୀ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନାଙ୍କ ନିକଟରେ କୃତଜ୍ଞତା ଜ୍ଞାପନ କରିଛନ୍ତି।
