ବିଶ୍ୱ ଦକ୍ଷତା କେନ୍ଦ୍ରରେ ମନ୍ତ୍ରୀ ଶ୍ରୀଯୁକ୍ତ ସମ୍ପଦ ଚନ୍ଦ୍ର ସ୍ବାଇଁଙ୍କ ସମୀକ୍ଷା
ଭୁବନେଶ୍ବର: ବିଶ୍ୱ ଦକ୍ଷତା କେନ୍ଦ୍ର ଓଡ଼ିଶାରେ ଉନ୍ନତମାନର ଦକ୍ଷତା ବିକାଶ ପାଇଁ ଦୃଢ଼ ଭିତ୍ତିପ୍ରସ୍ତର ସ୍ଥାପନ କରିଛି। ଏବେ ଏହାର ଭିତ୍ତିଭୂମିର ସମ୍ପୂର୍ଣ୍ଣ ବିନିଯୋଗ, ଶିଳ୍ପ ସହଭାଗିତାକୁ ସୁଦୃଢ଼ କରି ଏବଂ ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନଗୁଡ଼ିକ ମଧ୍ୟରେ ସମନ୍ୱୟ ରକ୍ଷା କରି ଏହାର ପରିସରକୁ ଆହୁରି ବ୍ୟାପକ କରିବାକୁ ହେବ। ଭୁବନେଶ୍ବରସ୍ଥିତ ବିଶ୍ବ ଦକ୍ଷତା କେନ୍ଦ୍ରର ଅଗ୍ରଗତି ଏବଂ ଭବିଷ୍ୟତ କାର୍ଯ୍ୟପନ୍ଥା ସଂପର୍କରେ ସମୀକ୍ଷା କରି ଏହା କହିଛନ୍ତି ଶିଳ୍ପ, ଦକ୍ଷତା ବିକାଶ ଏବଂ ବୈଷୟିକ ଶିକ୍ଷା ମନ୍ତ୍ରୀ ଶ୍ରୀଯୁକ୍ତ ସମ୍ପଦ ଚନ୍ଦ୍ର ସ୍ବାଇଁ। ଏହାସହ ଓଡ଼ିଶାର ଯୁବପିଢ଼ିଙ୍କୁ କେବଳ ଘରୋଇ ନିଯୁକ୍ତି ପାଇଁ ନୁହେଁ, ବରଂ ‘ୱାର୍ଲ୍ଡ ସ୍କିଲ୍ସ’ ଭଳି ବିଶ୍ୱସ୍ତରୀୟ ମଞ୍ଚ ପାଇଁ ପ୍ରସ୍ତୁତ କରିବାକୁ ଲକ୍ଷ୍ୟ ରହିଥିବା ସେ କହିଛନ୍ତି।
ରାଜ୍ୟରେ ଦକ୍ଷତା ବିକାଶ କ୍ଷେତ୍ରରେ ବିଶ୍ୱ ଦକ୍ଷତା କେନ୍ଦ୍ର ଏକ ପ୍ରମୁଖ ଅନୁଷ୍ଠାନ। ପ୍ରତିଷ୍ଠା ପରଠାରୁ ଏହା ୯,୦୦୦ ରୁ ଅଧିକ ଯୁବକ ଯୁବତୀଙ୍କୁ ପ୍ରଶିକ୍ଷଣ ଦେଇସାରିଛି। ଏହି କେନ୍ଦ୍ର ୯୯% ରୁ ଅଧିକ ନିଯୁକ୍ତି ହାର ହାସଲ କରିଛି। ଏଠାରୁ ପ୍ରଶିକ୍ଷଣ ପାଇଥିବା ପିଲାଙ୍କ ମଧ୍ୟରୁ ୨୫୧ ଜଣ ଟାଟା ଗ୍ରୁପ୍, ହିଟାଚି ଓ ୱିପ୍ରୋ ଭଳି ନାମୀଦାମୀ କମ୍ପାନୀରେ ବିଦେଶରେ ଚାକିରି ପାଇଛନ୍ତି। ଏହାସହ କେନ୍ଦ୍ର ପକ୍ଷରୁ ‘ପ୍ରଶିକ୍ଷକଙ୍କ ତାଲିମ’ କାର୍ଯ୍ୟକ୍ରମ ଜରିଆରେ ୪,୦୦୦ରୁ ଅଧିକ ଅଧ୍ୟାପକଙ୍କୁ ପ୍ରଶିକ୍ଷଣ ଦିଆଯାଇଛି। ଏଥିସହ ଆଡଭାନ୍ସଡ୍ ୱେଲ୍ଡିଂ, ଇଣ୍ଡଷ୍ଟ୍ରିଆଲ୍ ଅଟୋମେସନ୍ ଏବଂ ସ୍ମାର୍ଟ ମାନୁଫ୍ୟାକଚରିଂ ଭଳି ଅତ୍ୟାଧୁନିକ ବିଷୟରେ ଏଠାରେ ଉତ୍କର୍ଷ କେନ୍ଦ୍ରମାନ ସ୍ଥାପନ କରାଯାଇଛି।ମାନ୍ୟବର ମନ୍ତ୍ରୀ ବିଶ୍ୱ ଦକ୍ଷତା କେନ୍ଦ୍ରର ଅଗ୍ରଗତିକୁ ପ୍ରଶଂସା କରିବା ସହ ଏହାର ପରିସର ବୃଦ୍ଧି ନେଇ ଭବିଷ୍ୟତ କାର୍ଯ୍ୟପନ୍ଥା ସଂପର୍କରେ ଆଲୋଚନା କରିଛନ୍ତି। ଭିତ୍ତିଭୂମିର ସଠିକ୍ ଉପଯୋଗ ଉପରେ ଗୁରୁତ୍ୱ ଦେଇ ସେ ଅଧିକ ସଂଖ୍ୟକ ଛାତ୍ରଛାତ୍ରୀଙ୍କୁ ସାମିଲ କରିବା, ଶିଳ୍ପ-ଭିତ୍ତିକ ସ୍ୱଳ୍ପକାଳୀନ ପାଠ୍ୟକ୍ରମର ସମ୍ପ୍ରସାରଣ ଏବଂ ଅଣ୍ଡର-ୱାଟର ଓ ପାଇପ୍ ୱେଲଡିଂ ଭଳି ସ୍ୱତନ୍ତ୍ର ଦକ୍ଷତା କ୍ଷେତ୍ରଗୁଡ଼ିକ ଆରମ୍ଭ କରିବା ଉପରେ ଜୋର ଦେଇଛନ୍ତି। ଏହାସହ ସରକାରୀ ଅନୁଷ୍ଠାନ, ବେସରକାରୀ ଆଇଟିଆଇ ଏବଂ ପଲିଟେକନିକଗୁଡ଼ିକ ମଧ୍ୟରେ ଅଧିକ ସମନ୍ୱୟ ରକ୍ଷା କରିବାକୁ ମନ୍ତ୍ରୀ ଶ୍ରୀଯୁକ୍ତ ସ୍ବାଇଁ ଆହ୍ୱାନ ଦେଇଛନ୍ତି।ବୈଠକରେ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗର କମିଶନର-ତଥା-ସଚିବ ଶ୍ରୀଯୁକ୍ତ ଭୂପେନ୍ଦ୍ର ସିଂ ପୁନିଆ, ବିଶ୍ୱ ଦକ୍ଷତା କେନ୍ଦ୍ରର ସିଇଓ ଶ୍ରୀଯୁକ୍ତ ରଶ୍ମି ରଞ୍ଜନ ମହାପାତ୍ର, ସିଓଓ ଶ୍ରୀଯୁକ୍ତ ପିନାକୀ ପଟ୍ଟନାୟକ, ଅଧ୍ୟକ୍ଷ ଡକ୍ଟର ଶୁଭାଙ୍ଗ କିଶୋର ଦାସ ଏବଂ ଅନ୍ୟାନ୍ୟ ବରିଷ୍ଠ ପଦାଧିକାରୀମାନେ ଉପସ୍ଥିତ ଥିଲେ।
