ମୁମ୍ବାଇଠାରେ ଜାତୀୟ ପ୍ରଦର୍ଶନୀରେ ୫ଜଣ ଓଡ଼ିଆ ଶିଳ୍ପୀ
ଭୁବନେଶ୍ୱର,: ମୁମ୍ବାଇର ନେହେରୁ ଆର୍ଟ ସେଣ୍ଟରରେ ଚଳିତ ମାସ ୨୬ ତାରିଖରୁ ଆୟୋଜିତ ହେବାକୁ ଥିବା ଜାତୀୟ କଳା ପ୍ରଦର୍ଶନୀରେ ଓଡ଼ିଶାର ପାଞ୍ଚଜଣ ଶିଳ୍ପୀଙ୍କ କଳାକୃତି ପ୍ରଦର୍ଶିତ ହେବ।ଏଥିରେ ଧଉଳି ଚାରୁକଳା ମହାବିଦ୍ୟାଳୟର ଅଧ୍ୟକ୍ଷ ତଥା ବରିଷ୍ଠ ଚିତ୍ରଶିଳ୍ପୀ ଡ. ପଞ୍ଚାନନ ସାମଲ,ଜାତୀୟ ପୁରସ୍କାର ପ୍ରାପ୍ତ ଭାସ୍କର୍ଯ୍ୟ ଶିଳ୍ପୀ ଚନ୍ଦନ କୁମାର ସାମଲ ଓ ନରୋତ୍ତମ ଦାସ,ଭାସ୍କର୍ଯ୍ୟ ଶିଳ୍ପୀ ହିମାଂଶୁ ମହାନ୍ତ ଏବଂ ଚିତ୍ରଶିଳ୍ପୀ ସୋଫିୟା ୟାସ୍ମିନ୍ ଙ୍କ ସମସାମୟିକ ଚିତ୍ରକଳା ଓ ଭାସ୍କର୍ଯ୍ୟ କଳା ପ୍ରଦର୍ଶିତ ହେବ।
ପ୍ରଦର୍ଶନୀରେ ପଞ୍ଚାନନ ସାମଲଙ୍କ ସମସାମୟିକ ବିଷୟବସ୍ତୁ ଉପରେ ଆଧାରିତ ନୈରୂପ୍ୟ ବାଦୀ ଚିତ୍ରକଳା ଗୁଡ଼ିକ ପ୍ରଦର୍ଶିତ ହେବା ସହିତ ଚନ୍ଦନ ସାମଲଙ୍କ ପ୍ରକୃତି ଶୀର୍ଷକ ସମସାମୟିକ ପ୍ରସ୍ତର ଭାସ୍କର୍ଯ୍ୟ ପ୍ରଦର୍ଶିତ ହେବ। ନରୋତ୍ତମ ଦାସ ସେରାମିକ ଭାସ୍କର୍ଯ୍ୟରେ ପୌରାଣିକ ବିଷୟବସ୍ତୁକୁ ନେଇ ଆଧୁନିକ ଶୈଳୀରେ ଭାସ୍କର୍ଯ୍ୟ ରୁପ ଦେଇଥିବା ବେଳେ ହିମାଂଶୁ ମହାନ୍ତ ଓଡ଼ିଶାର କାଳଜୟୀ ପୁସ୍ତକ ଗୁଡ଼ିକୁ ମୁଗୁନି ପ୍ରସ୍ତରରେ ବାସ୍ତବ ରୂପ ପ୍ରଦାନ କରିଛନ୍ତି ଏବଂ ସୋଫିୟା ପରିତ୍ୟକ୍ତ ଆସବା ପତ୍ର ଗୁଡ଼ିକୁ ସମସାମୟିକ ଚିତ୍ର ରୂପ ପ୍ରଦାନ କରିଛନ୍ତି ଯାହା ବେଶ୍ ମନମୁଗ୍ଧକର।ଏହି ପ୍ରଦର୍ଶନୀରେ ଚଣ୍ଡିଗଡ,ନୂଆଦିଲ୍ଲୀ,କଲିକତା,ମୁମ୍ବାଇ ଓ ରାଜସ୍ଥାନରୁ ଶିଳ୍ପୀ ମାନଙ୍କ ସମସାମୟିକ ଚିତ୍ରକଳା ଓ ଭାସ୍କର୍ଯ୍ୟ କଳା ମଧ୍ୟ ପ୍ରଦର୍ଶିତ ହେବ।
