ଯୁବକର ତଣ୍ଟି କାଟି ହତ୍ୟା
ପୁରୀ ସ୍ବର୍ଗଦ୍ବାର ନିକଟ ଚୈତନ୍ୟ ଛକରେ ଅଭାବନୀୟ ଘଟଣା। ଜଣେ ଯୁବକର ତଣ୍ଟି କାଟି ହତ୍ୟା କରିଛି ଜଣେ ଯୁବକ। ହତ୍ୟାକାଣ୍ଡର ଶିକାର ହୋଇଥିବା ଯୁବକ ଜଣକ ହେଉଛନ୍ତି ଭଦ୍ରକ ବନ୍ତ ଥାନା ଅଞ୍ଚଳର ରଞ୍ଜନ କୁମାର ଦାସ। ଗତକାଲି ରଞ୍ଜନ ତାଙ୍କ ସମ୍ପର୍କୀୟଙ୍କ ଶବଦାହ ପାଇଁ ସ୍ବର୍ଗଦ୍ବାର ଆସିଥିଲେ। ଶବଦାହ ସଂସ୍କାର ପାଇଁ ଆବଶ୍ୟକ ଥିବା ଏକ ପଇଡ କିଣିବା ପାଇଁ ରଞ୍ଜନ ସ୍ବର୍ଗଦ୍ବାର ନିକଟ ଚୈତନ୍ୟ ଛକକୁ ଯାଇଥିଲେ। ତାଙ୍କ ସହ ଅନ୍ୟ ସମ୍ପର୍କୀୟ ମାନେ ମଧ୍ୟ ଥିଲେ। ତେବେ ଚୈତନ୍ୟ ଛକରେ ଥିବା ଜଣେ ଯୁବକ ରଞ୍ଜନଙ୍କ ସହ ପାଟିତୁଣ୍ଡ କରି ତାଙ୍କ ବେକରେ ଛୁରୀ ଭୁଷି ଦେଇଥିବାରୁ ଘଟଣାସ୍ଥଳରେ ହିଁ ରଞ୍ଜନ ଙ୍କ ମୃତ୍ୟୁ ଘଟିଥିଲା। ସେହିପରି ତାଙ୍କ ସହିତ ଥିବା ମାନସ ରଞ୍ଜନ ନାୟକ ମଧ୍ୟ ଦୁର୍ବୁତ୍ତ ର ଆକ୍ରମଣର ଶିକାର ହୋଇ ଗୁରୁତର ଆହତ ହୋଇଛନ୍ତି। ସ୍ବର୍ଗଦ୍ବାର ଭଳି ଏକ ଗୁରୁତ୍ୱପୂର୍ଣ୍ଣ ସ୍ଥାନରେ ଏଭଳି ହତ୍ୟାକାଣ୍ଡ ଏବେ ଚାଞ୍ଚଲ୍ୟ ସୃଷ୍ଟି କରିଛି। ପୁରୀକୁ ଆସୁଥିବା ଯାତ୍ରୀଙ୍କୁ ଦୁର୍ବୁତ୍ତମାନେ ଖୁଲମଖୁଲା ଛୁରୀ ରେ ଆକ୍ରମଣ କରି ହତ୍ୟା କରିବାକୁ ନେଇ ଯାତ୍ରୀଙ୍କ ସୁରକ୍ଷା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି। ତୁରନ୍ତ ଅଭିଯୁକ୍ତକୁ ଗିରଫ କରିବା ସହିତ ଅଭିଯୁକ୍ତ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ମୃତକଙ୍କ ସମ୍ପର୍କୀୟ ଦାବି କରିଛନ୍ତି। ଏଭଳି ହତ୍ୟାକାଣ୍ଡ ଘଟଣା ଏବେ ପୁରୀ ସହରରେ ଭୟର ବାତାବରଣ ଖେଳାଇ ଦେଇଛି। ଏହି ହତ୍ୟାକାଣ୍ଡ ଘଟଣା ପରେ ସମୁଦ୍ର କୂଳ ଥାନା ପୋଲିସ ତନାଘନା ଆରମ୍ଭ କରିଥିବା ବେଳେ ଜଣେ ଯୁବକକୁ ପୋଲିସ ଅଟକ ରଖି ପଚରାଉଚରା କରୁଛି। ଘଟଣାସ୍ଥଳରେ ସିସିଟିଭି ଫୁଟେଜ କୁ ମଧ୍ୟ ଯାଞ୍ଚ କରୁଛି ପୋଲିସ। ପୁରୀ ସହରରେ ଅପରାଧୀ ଙ୍କ ତାଲିକା କରାଯାଇ ସେମାନଙ୍କ ବିରୋଧ ରେ କାର୍ଯ୍ୟାନୁଷ୍ଠାନ ନେବାକୁ ପୁରୀ ଏସପି ଙ୍କ ନିର୍ଦ୍ଦେଶ ଥିବାବେଳେ ଏହା ସଠିକ୍ ଭାବରେ କାର୍ଯ୍ୟକାରୀ ହେଉନଥିବା ଏହି ଘଟଣାରୁ ସ୍ପଷ୍ଟ ହୋଇଯାଇଛି। ସେହିପରି ରାତିରେ ପୋଲିସ ପକ୍ଷରୁ ବଡ଼ଦାଣ୍ଡ, ପୁରୀ ବେଳାଭୂମି, ସ୍ବର୍ଗଦ୍ବାର ଅଞ୍ଚଳରେ ଅଧିକ ପୋଲିସ ମୁତୟନ ସହିତ କଡ଼ା ପେଟ୍ରୋଲିଙ୍ଗ କରାଯିବାକୁ ଦାବି ହୋଇଛି।
