ପାରାଦୀପ ବନ୍ଦର ପ୍ରାଧିକରଣ ଓ ମେରିଟାଇମ ବୋର୍ଡ ମଧ୍ୟରେ ବୁଝାମଣାପତ୍ର ସ୍ଵାକ୍ଷରିତ
ପାରାଦୀପ /ଭାବନଗର – ଓଡ଼ିଶାରେ ଏକ ବୃହତ ଜାହାଜ ନିର୍ମାଣ କ୍ଲଷ୍ଟର ବିକଶିତ କରିବା ପାଇଁ ପାରାଦୀପ ବନ୍ଦର ପ୍ରାଧିକରଣ କତ୍ତୃପକ୍ଷ ଏବଂ ଓଡ଼ିଶା ସାମୁଦ୍ରିକ ବୋର୍ଡ ମଧ୍ୟରେ ଏକ ବୁଝାମଣାପତ୍ର ବା ଏମଓୟୁ ସ୍ଵାକ୍ଷରିତ କରିଛନ୍ତି। ସେପ୍ଟେମ୍ବର ୧୯, ୨o୨୫ ରେ ସ୍ୱାକ୍ଷରିତ ଏହି ସହଭାଗୀତା ଭାରତର ମହତ୍ୱାକାଂକ୍ଷୀ ସାମୁଦ୍ରିକ ଅମୃତ କାଳ ୨o୪୭ ଦୃଷ୍ଟିକୋଣ ସହିତ ବିଶ୍ୱ ସ୍ତରରେ ଶ୍ରେଷ୍ଠ ପାଞ୍ଚଟି ଜାହାଜ ନିର୍ମାଣ ଦେଶ ମଧ୍ୟରେ ସ୍ଥାନିତ କରିବା ପାଇଁ ଲକ୍ଷ୍ୟ ରଖିଛି। ପ୍ରସ୍ତାବିତ ଜାହାଜ ନିର୍ମାଣ କ୍ଲଷ୍ଟରଟି କେନ୍ଦ୍ରାପଡ଼ା ଜିଲ୍ଲାର ମହାନଦୀ କୂଳରେ ପାରାଦୀପର ଇଫକୋ ସାର କାରଖାନା ପଛପଟେ ନିର୍ମାଣ ହେବ ଏବଂ ଏହାର ଆନୁମାନିକ ମୂଲ୍ୟ ୨୪ ହଜାର ୭oo କୋଟି ଟଙ୍କା ହେବ। ଏହି ପ୍ରକଳ୍ପର ଲକ୍ଷ୍ୟ ହେଉଛି ଏକ ସମ୍ପୂର୍ଣ୍ଣ ସମନ୍ୱିତ ଇକୋସିଷ୍ଟମ ସୃଷ୍ଟି କରିବା, ଯେଉଁଥିରେ ପ୍ରତିବର୍ଷ ୧.o-୧୨ ନିୟୁତ ଗ୍ରସ୍ ଟନେଜ୍ କ୍ଷମତା ସହିତ ଏକ କିମ୍ବା ଅଧିକ ବଡ଼ ଜାହାଜ ନିର୍ମାଣ କେନ୍ଦ୍ର ରହିବ। ଯୋଜନାବଦ୍ଧ କ୍ଲଷ୍ଟରର ପ୍ରମୁଖ ଉପାଦାନଗୁଡ଼ିକ ମଧ୍ୟରେ ୨.o-୨.୫ କିଲୋମିଟରର ଏକ ସମର୍ପିତ ଜଳକୂଳ ଏବଂ ୨,ooo ରୁ ୨,୫oo ଏକର ଜମି କ୍ଷେତ୍ରଫଳ ରେ ଏହା ପ୍ରତିଷ୍ଠା କରାଯିବ l
ଜାହାଜ ନିର୍ମାଣ ପ୍ରକ୍ରିୟାକୁ ସମର୍ଥନ କରିବା ପାଇଁ ଇଞ୍ଜିନ ନିର୍ମାଣ, ଇସ୍ପାତ ନିର୍ମାଣ ଏବଂ ଉପକରଣ ଯୋଗାଣକାରୀ ଭଳି ଆନୁଷଙ୍ଗିକ ଶିଳ୍ପ ପାଇଁ ସ୍ଥାନ,ପ୍ରଶାସନିକ କାର୍ଯ୍ୟାଳୟ, ତାଲିମ କେନ୍ଦ୍ର, ଏବଂ ଗବେଷଣା ଏବଂ ବିକାଶ ସୁବିଧା ସମେତ ସାଧାରଣ ଭିତ୍ତିଭୂମି ନିର୍ମାଣ କରାଯିବ l ପ୍ରକଳ୍ପକୁ ତ୍ୱରାନ୍ୱିତ କରିବା ପାଇଁ ଆବଶ୍ୟକୀୟ ସ୍ଥଳ-ପାର୍ଶ୍ୱ ଏବଂ ନଦୀ-ପାର୍ଶ୍ୱ ଭିତ୍ତିଭୂମି ବିକାଶ ପାଇଁ ପାରାଦୀପ ବନ୍ଦର ଏବଂ ମେରିଟାଇମ ବୋର୍ଡ ସହଯୋଗ କରିବେ। ଏହି କ୍ଲଷ୍ଟର-ଆଧାରିତ ପଦ୍ଧତି ନିବେଶକୁ ଆକର୍ଷିତ କରିବା, ପ୍ରତିଯୋଗିତାମୂଳକତା ବୃଦ୍ଧି କରିବା ଏବଂ ଭାରତର ବାଣିଜ୍ୟିକ ଜାହାଜ ନିର୍ମାଣ କ୍ଷମତାରେ ସ୍ଥାୟୀ ଅଭିବୃଦ୍ଧିକୁ ଆଗେଇ ନେବା ପାଇଁ ନକ୍ସା ପ୍ରସ୍ତୁତ କରାଯାଇଛି।
ସେହିପରି ନୂତନ ସାଟେଲାଇଟ୍ ବନ୍ଦର ପାଇଁ ପାରାଦୀପ ବନ୍ଦର କର୍ତ୍ତୃପକ୍ଷ, ଓଡ଼ିଶା ସାମୁଦ୍ରିକ ବୋର୍ଡ ଏବଂ ସାଗରମାଳା ଫାଇନାନ୍ସ କର୍ପୋରେସନ ଙ୍କ ମଧ୍ୟରେ ତ୍ରିପାକ୍ଷିକ ଚୁକ୍ତିନାମା ସ୍ଵାକ୍ଷରିତ ହୋଇଛି l
ତେବେ ଏହି ବୁଝାମଣା ପତ୍ର ସ୍ଵାକ୍ଷର ଅବସରରେ ପାରାଦୀପ ଜୟଦେବ ସଦନ ଠାରେ ଆୟୋଜିତ ସିଧା ପ୍ରସାରଣ କାର୍ଯ୍ୟକ୍ରମରେ ରାଜ୍ୟ ଶିଳ୍ପ, ଦକ୍ଷତା ବିକାଶ ତଥା ବୈଷୟିକ ଶିକ୍ଷା ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ, ଜଗତସିଂହପୁର ସାଂସଦ ବିଭୁ ତରାଇ, ପାରାଦୀପ ପୌରାଧ୍ୟକ୍ଷ ବସନ୍ତ ବିଶ୍ଵାଳ ଙ୍କ ସମେତ ବିଭିନ୍ନ ଶ୍ରମିକ ସଙ୍ଘ ର କର୍ମକର୍ତ୍ତା ମାନେ ଉପସ୍ଥିତ ଥିଲେ l
