ଧର୍ମଗଡ଼ R&B ସବ୍-ଡିଭିଜନର ନିର୍ବାହୀ ଯନ୍ତ୍ରୀ ଭୁବନେଶ୍ୱର ଶବର ଆଜି ଓଡ଼ିଶା ଭିଜିଲାନ୍ସ ଦ୍ୱାରା ଗିରଫ
ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଓଡ଼ିଶା ଭିଜିଲାନ୍ସ ଦ୍ବାରା ଭବାନୀପାଟଣା R&B ଡିଭିଜନର ନିର୍ବାହୀ ଯନ୍ତ୍ରୀ (EE) ଶ୍ରୀ ଭୁବନେଶ୍ୱର ଶବର ଗିରଫ। ଜ୍ଞାତ ଆୟର ୨୧୦% ଅଧିକ ସମ୍ପତ୍ତି ଠାବ, ଯେଉଁଥିରେ ୫ଟି କୋଠା (୪ଟି ବହୁତଳ ପ୍ରାସାଦ), ୮୩ ଏକର ଜମି (୯୭ଟି ପ୍ଲଟ୍), ୧୭ ଏକର ପରିମିତ ୨ଟି ଫାର୍ମ ହାଉସ୍ ଏବଂ ୮ଟି କ୍ୟାବିନ୍ ବିଶିଷ୍ଟ ୧ଟି ମାର୍କେଟ କମ୍ପ୍ଲେକ୍ସ ଇତ୍ୟାଦି ଅନ୍ତର୍ଭୁକ୍ତ।
ଧର୍ମଗଡ଼ R&B ସବ୍-ଡିଭିଜନର ନିର୍ବାହୀ ଯନ୍ତ୍ରୀ (EE) ତଥା ଭବାନୀପାଟଣା R&B ଡିଭିଜନର ପ୍ରଭାରୀ ନିର୍ବାହୀ ଯନ୍ତ୍ରୀ ଶ୍ରୀ ଭୁବନେଶ୍ୱର ଶବରଙ୍କୁ ଓଡ଼ିଶା ଭିଜିଲାନ୍ସ ଗିରଫ କରି ଭବାନୀପାଟଣାସ୍ଥିତ ସ୍ୱତନ୍ତ୍ର ଜଜ୍ (ଭିଜିଲାନ୍ସ)ଙ୍କ କୋର୍ଟକୁ ଚାଲାଣ କରିଛି। ଶ୍ରୀ ଶବରଙ୍କ ପାଖରୁ ତାଙ୍କ ଜ୍ଞାତ ଆୟର ୨୧୦% ଅଧିକ ଆୟ ବହିର୍ଭୂତ ସମ୍ପତ୍ତି (DA) ମିଳିଥିଲା, ଯାହାର ସେ କୌଣସି ସନ୍ତୋଷଜନକ ହିସାବ ଦେଇପାରି ନଥିଲେ। ଏହି ସଂକ୍ରାନ୍ତରେ ଶ୍ରୀ ଭୁବନେଶ୍ୱର ଶବର (ନିର୍ବାହୀ ଯନ୍ତ୍ରୀ), ତାଙ୍କ ପତ୍ନୀ ଏବଂ ଦୁଇ ସାନ ଭାଇଙ୍କ ବିରୋଧରେ ଦୁର୍ନୀତି ନିବାରଣ ସଂଶୋଧନ ଅଧିନିୟମ, ୨୦୧୮ ର ଧାରା 13(2) r/w 13(1)(b)/12 ଅନୁଯାୟୀ କୋରାପୁଟ ଭିଜିଲାନ୍ସ ଥାନା କେସ୍ ନଂ-୦୭ (ତାରିଖ: ୨୦.୦୫.୨୦୨୬) ପଞ୍ଜୀକୃତ କରାଯାଇଛି।
ଘର ଚଢ଼ାଉ ସମୟରେ ଶ୍ରୀ ଭୁବନେଶ୍ୱର ଶବର ଏବଂ ତାଙ୍କ ପରିବାର ସଦସ୍ୟଙ୍କ ନାମରେ କୋଟି କୋଟି ଟଙ୍କାର ନିମ୍ନଲିଖିତ ସ୍ଥାବର ଓ ଅସ୍ଥାବର ସମ୍ପତ୍ତି ଠାବ କରାଯାଇଛି:
୧) ଭବାନୀପାଟଣା ସହରର ଗୋସାଇଁମୁଣ୍ଡାସ୍ଥିତ ପ୍ଲଟ୍ ନଂ-୪୭/୩୫୮ ରେ ପ୍ରାୟ ୫୨୨୫ ବର୍ଗଫୁଟର ଏକ ଦୁଇ ମହଲା କୋଠା।
୨) କଳାହାଣ୍ଡି ଜିଲ୍ଲା କୋକସରା ଅନ୍ତର୍ଗତ କୁସୁମଖୁଣ୍ଟିଠାରେ ପ୍ରାୟ ୨୬୨୫ ବର୍ଗଫୁଟର ଏକ ଦୁଇ ମହଲା କୋଠା।
୩) କୋକସରା ବ୍ଲକର ମୋଟେର ଛକଠାରେ ୪୨୨୮ ବର୍ଗଫୁଟର ଏକ ନିର୍ମାଣାଧୀନ ଦୁଇ ମହଲା କୋଠା।
୪) କଳାହାଣ୍ଡି ଜିଲ୍ଲା କୋକସରା ଅନ୍ତର୍ଗତ କୁସୁମଖୁଣ୍ଟିଠାରେ ପ୍ରାୟ ୧୩୦୦ ବର୍ଗଫୁଟର ଆଉ ଏକ ନିର୍ମାଣାଧୀନ ଦୁଇ ମହଲା କୋଠା।
୫) କଳାହାଣ୍ଡି ଜିଲ୍ଲାର ଦ୍ଵାରଶୁନୀ ଠାରେ ସ୍ୱେରେଜ୍ ଟ୍ୟାଙ୍କ ଏବଂ ବୋରୱେଲ୍ ସହିତ ୧୧୮୦ ବର୍ଗଫୁଟର ଏକ କୋଠା।
୬) କୋକସରା ମୋଟେର ଛକଠାରେ ୮ଟି କ୍ୟାବିନ୍ ଥିବା ୨୨୧୪ ବର୍ଗଫୁଟର ଏକ ମାର୍କେଟ କମ୍ପ୍ଲେକ୍ସ।
୭) ଭବାନୀପାଟଣା ସହର ନିକଟସ୍ଥ କିଟ୍ପାଦରଠାରେ ୧୬.୯୩ ଏକର (ଗୋଟିଏ ୯.୯୩ ଏକର ଏବଂ ଅନ୍ୟଟି ୭ ଏକର) ପରିମିତ ଦୁଇଟି ଫାର୍ମ ହାଉସ୍, ଯେଉଁଠାରେ ବହୁ ସଂଖ୍ୟାରେ ଆମ୍ବ, ନଡ଼ିଆ ଏବଂ ତାଳ ଗଛ ରହିଛି।
୮) ଭବାନୀପାଟଣା, କୋକସରା ଏବଂ ନବରଙ୍ଗପୁର ସହର ଉପକଣ୍ଠରେ ମୋଟ ୮୩.୧୧୫ ଏକର ପରିମିତ ୯୭ଟି ପ୍ଲଟ୍।
୯) ୧୦.୭୨ ଲକ୍ଷ ଟଙ୍କାର ବ୍ୟାଙ୍କ ଜମା।
୧୦) ୧ଟି ଚାରିଚକିଆ ଯାନ (ହୁଣ୍ଡାଇ କ୍ରେଟା)।
୧୧) ପ୍ରାୟ ୧୯.୭୮ ଲକ୍ଷ ଟଙ୍କାର ନଗଦ ଅର୍ଥ ଏବଂ ଗୃହୋପକରଣ ସାମଗ୍ରୀ।
ବ୍ୟାପକ ଚଢ଼ାଉ, ସମ୍ପତ୍ତି ତାଲିକା ପ୍ରସ୍ତୁତି ଏବଂ ପରବର୍ତ୍ତୀ ଅନୁସନ୍ଧାନ ପରେ ଭବାନୀପାଟଣା R&B ଡିଭିଜନର EE ଶ୍ରୀ ଭୁବନେଶ୍ୱର ଶବରଙ୍କ ଆୟ, ବ୍ୟୟ ଏବଂ ସମ୍ପତ୍ତିର ହିସାବ କରାଯାଇଥିଲା। ଏଥିରେ ସେ ନିଜର ଜ୍ଞାତ ଆୟ ତୁଳନାରେ ୨୧୦% ଅଧିକ ଆୟ ବହିର୍ଭୂତ ସମ୍ପତ୍ତି ରଖିଥିବା ଜଣାପଡ଼ିଛି।
ଆଜି ଭବାନୀପାଟଣାଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କୋରାପୁଟ ଭିଜିଲାନ୍ସ ଏସପି (SP) ରବୀନ୍ଦ୍ର କୁମାର ପଣ୍ଡା ଏହି ସୂଚନା ଦେଇଛନ୍ତି।
ବିଦ୍ୟାଧର ସାହୁଙ୍କ ରିପୋର୍ଟ…..
