NCC କ୍ୟାଡେଟ୍ମାନଙ୍କ ଦ୍ୱାରା ‘ଜଳଛତ୍ର’ ଆୟୋଜନ
ଭୁବନେଶ୍ୱର: ଜଳ ପଖ୍ୱାଡା ଅବସରରେ PM SHRI କେନ୍ଦ୍ରୀୟ ବିଦ୍ୟାଳୟ ନଂ–୧ ଭୁବନେଶ୍ୱରରେ NCC ଆର୍ମି ୱିଙ୍ଗର କ୍ୟାଡେଟ୍ମାନଙ୍କ ଦ୍ୱାରା ଏକ ‘ଜଳ ଛତ୍ର’ (ପାଣି ବଣ୍ଟନ ଶିବିର) ସଫଳତାର ସହ ଆୟୋଜନ କରାଯାଇଥିଲା। ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ ଥିଲା ଜଳ ସଂରକ୍ଷଣର ଗୁରୁତ୍ୱ ବିଷୟରେ ସଚେତନତା ସୃଷ୍ଟି କରିବା ସହିତ ତିବ୍ର ଗ୍ରୀଷ୍ମ ତାପର ମାନବ ଶରୀର ଉପରେ ପଡ଼ୁଥିବା କୁପ୍ରଭାବ ବିଷୟରେ ଜଣାଇବା।ଏହି କାର୍ଯ୍ୟକ୍ରମରେ NCC କ୍ୟାଡେଟ୍ମାନଙ୍କ ଉତ୍ସାହଭରା ଭାଗିଦାରୀ ଦେଖିବାକୁ ମିଳିଥିଲା।
ଆବଶ୍ୟକ ସାମଗ୍ରୀ ସଂଗ୍ରହରୁ ଆରମ୍ଭ କରି ଶୀତଳ ପାନୀୟ ପ୍ରସ୍ତୁତି ପର୍ଯ୍ୟନ୍ତ ସମସ୍ତ କାର୍ଯ୍ୟ ସେମାନେ ନିଜେ ନିଜେ ସଂପନ୍ନ କରିଥିଲେ। ଏହା ମାଧ୍ୟମରେ ସେମାନଙ୍କର ଦଳୀୟ କାର୍ଯ୍ୟଦକ୍ଷତା, ଶିଷ୍ଟାଚାର ଓ ସମାଜ ସେବା ପ୍ରତି ନିଷ୍ଠା ପ୍ରକାଶ ପାଇଥିଲା।ପାନୀୟ ପ୍ରସ୍ତୁତି ପରେ କ୍ୟାଡେଟ୍ମାନେ ବିଦ୍ୟାଳୟର ମୁଖ୍ୟ ପ୍ରବେଶଦ୍ୱାର ସମୀପରେ ସ୍ଥିତି ଗ୍ରହଣ କରି ସାଧାରଣ ଲୋକମାନଙ୍କୁ ଏହା ବଣ୍ଟନ କରିଥିଲେ। ତିବ୍ର ଗ୍ରୀଷ୍ମ ତାପରେ ଏହି ପଦକ୍ଷେପକୁ ସାଧାରଣ ଲୋକମାନେ ବହୁତ ପ୍ରଶଂସା କରିଥିଲେ।ବିଦ୍ୟାଳୟର ଶିକ୍ଷକମାନେ ଏହି କାର୍ଯ୍ୟକ୍ରମରେ ସକ୍ରିୟ ସହଯୋଗ କରିଥିଲେ, ଏବଂ ଅଭିଭାବକମାନେ ମଧ୍ୟ ବ୍ୟବସ୍ଥାପନାରେ ସହଯୋଗ କରିଥିଲେ। ସମସ୍ତଙ୍କ ଏକତ୍ର ପ୍ରୟାସରେ କାର୍ଯ୍ୟକ୍ରମଟି ସଫଳ ହୋଇଥିଲା।
ବିଦ୍ୟାଳୟର ପ୍ରଧାନାଚାର୍ଯ୍ୟ ଶ୍ରୀ ଆଦିତ୍ୟ କୁମାର ପାଣ୍ଡା କ୍ୟାଡେଟ୍ମାନଙ୍କ ପ୍ରୟାସକୁ ପ୍ରଶଂସା କରି ସମାଜ ସେବା କାର୍ଯ୍ୟରେ ସକ୍ରିୟ ଭାଗ ନେବାକୁ ଉତ୍ସାହିତ କରିଥିଲେ। ସେ କହିଥିଲେ ଯେ, ଏପରି କାର୍ଯ୍ୟକ୍ରମ ଛାତ୍ରଛାତ୍ରୀମାନଙ୍କ ମଧ୍ୟରେ ସମ୍ବେଦନଶୀଳତା, ଦାୟିତ୍ୱବୋଧ ଓ ନାଗରିକତାର ମୂଲ୍ୟବୋଧକୁ ଉନ୍ନତ କରେ।କ୍ୟାଡେଟ୍ମାନେ ଏହି କାର୍ଯ୍ୟରୁ ଆତ୍ମସନ୍ତୋଷ ଅନୁଭବ କରିଥିବା ବ୍ୟକ୍ତ କରିଥିଲେ ଏବଂ ସେମାନେ ବୁଝିପାରିଥିଲେ ଯେ, ଅନ୍ୟମାନଙ୍କୁ ସହାୟତା କରିବା ଓ ସମାଜକୁ ସେବା କରିବାର ଆନନ୍ଦ ନିଜସ୍ୱ ଲାଭ ଠାରୁ ଅଧିକ।
ଏହି ପଦକ୍ଷେପ NCC କ୍ୟାଡେଟ୍ମାନଙ୍କ ସେବାଭାବକୁ ପ୍ରକାଶ କରିବା ସହିତ NCC ର ମୂଳ ଲକ୍ଷ୍ୟ—ସମାଜ ଉନ୍ନତି, ଶିଷ୍ଟାଚାର ଓ ନେତୃତ୍ୱ ଗୁଣର ବିକାଶ—କୁ ମଧ୍ୟ ସୁଦୃଢ଼ କରିଛି। NCC ଦ୍ୱାରା ଦିଆଯାଉଥିବା ଡ୍ରିଲ୍, ମାର୍ଚ୍ଚିଂ, ଅସ୍ତ୍ର ପ୍ରଶିକ୍ଷଣ, ଫାୟାରିଂ ଓ ନେତୃତ୍ୱ ଗୁଣ ଭବିଷ୍ୟତରେ ଦେଶ ନେତୃତ୍ୱ ପାଇଁ ସାହାଯ୍ୟ କରିବ।ଏପରି ପଦକ୍ଷେପ ଆଗାମୀ ଦିନରେ ଅଧିକ କ୍ୟାଡେଟ୍ମାନଙ୍କୁ ସମାଜ ସେବାରେ ଭାଗ ନେବାକୁ ପ୍ରେରିତ କରିବ ବୋଲି ଆଶା କରାଯାଉଛି। କ୍ୟାଡେଟ୍ମାନେ ଏହି କାର୍ଯ୍ୟକ୍ରମକୁ ଏପରି ଭାବରେ ପାଳନ କରିଥିଲେ ଯେ, NCC ର ମୂଳ ମନ୍ତ୍ର “ଏକତା ଓ ଶିଷ୍ଟାଚାର” କୁ ସତ୍ୟ ସାବିତ କରିଥିଲା।
