ନବନିର୍ମାଣ କୃଷକ ସଂଗଠନର ରାଜ୍ୟ ମୁଖ୍ୟଙ୍କ ସହ ପ୍ରମୁଖ ନେତୃତ୍ୱ ଓଜେସିରେ ସାମିଲ

ଚାଷୀଙ୍କ ପାଇଁ ଲଢ଼ିବୁ, ଚାଷୀଙ୍କୁ ନେଇ ବଢ଼ିବୁ : ମହମ୍ମଦ ମୋକିମ୍
ଚାଷୀଙ୍କ ଦଳ ହେବ ଓଜେସି : ଶେଷଦେବ ନନ୍ଦ
ଭୁବନେଶ୍ୱର, : ରାଜ୍ୟର ପ୍ରମୁଖ କୃଷକ ନେତା ତଥା ନବନିର୍ମାଣ କୃଷକ ସଂଗଠନର ରାଜ୍ୟ ସଂଯୋଜକ ଶେଷଦେବ ନନ୍ଦ ଓ ଅନ୍ୟତମ ଦୁଇ ରାଜ୍ୟ ସହ ସଂଯୋଜକ ନିମାଇଁ ରାୟ ଓ ଉମାକାନ୍ତ ଭାରତ ପ୍ରମୁଖ ନିଜ ସମର୍ଥକଙ୍କ ସହ ଆଜି ଓଡ଼ିଶା ଜନତା କଂଗ୍ରେସରେ ଆନୁଷ୍ଠାନିକ ଭାବେ ସାମିଲ ହୋଇଛନ୍ତି । ସେମାନଙ୍କ ସହ କୃଷକ ସଂଗଠନର ବହୁ ଜିଲ୍ଲା ସଂଯୋଜକଙ୍କ ସହିତ ଜିଲ୍ଲା ଓ ବ୍ଲକ ସ୍ତରୀୟ କୃଷକନେତାମାନେ ମଧ୍ୟ ଓଜେସିରେ ସାମିଲ ହୋଇଛନ୍ତି । ସ୍ଥାନୀୟ ସହିଦନଗର ଦୁର୍ଗାପୂଜା ମଣ୍ଡପ ନିକଟରେ କୃଷକ ନେତାମାନେ ଏକତ୍ରିତ ହୋଇ ସେଠାରୁ ଏକ ସୁସଜ୍ଜିତ ଶୋଭାଯାତ୍ରାରେ ଓଜେସି ରାଜ୍ୟ କାର୍ଯ୍ୟାଳୟ ଅଭିମୁଖେ ଯାତ୍ରା କରିଥିଲେ । ଏହି ଯାତ୍ରାରେ ଚାଷୀମାନେ ନିଜ ଟ୍ରାକ୍ଚରକୁ ମଧ୍ୟ ସାମିଲ କରିଥିଲେ । ଏହାପରେ ଓଜେସି କାର୍ଯ୍ୟାଳୟରେ ଆୟୋଜିତ ମିଶ୍ରଣ ପର୍ବରେ ଉପରୋକ୍ତ ନେତୃତ୍ୱମାନଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା । ପ୍ରଥମେ ଓଜେସି ସଭାପତି ଇଂ ମହମ୍ମଦ ମୋକିମ୍ ଦଳୀୟ ଉତ୍ତରୀୟ ଦେଇ ଶେଷଦେବ ନନ୍ଦଙ୍କ ସହ ଅନ୍ୟ ନେତୃତ୍ୱମାନଙ୍କୁ ଦଳରେ ସାମିଲ କରିଥିଲେ । ଏହି ପରିପ୍ରେକ୍ଷୀରେ ଓଡ଼ିଶା କୃଷକ ଜନତା କଂଗ୍ରେସ ସଭାପତି ସଂଗ୍ରାମ କିଶୋର ମାଝୀଙ୍କ ସଭାପତିତ୍ୱରେ ଆୟୋଜିତ ସଭାରେ ଓଜେସି ସଭାପତି ଶ୍ରୀ ମୋକିମ୍ କହିଥିଲେ ଯେ, ଓଡ଼ିଶା ଏକ କୃଷି ପ୍ରଧାନ ରାଜ୍ୟ । କୃଷକମାନେ ଓଡ଼ିଶାର ପ୍ରାଣ । ଓଜେସି ଓଡ଼ିଆ ଚାଷୀମାନଙ୍କର ‘ସ୍ୱାର୍ଥ, ସମ୍ମାନ ଓ ସ୍ୱାଭିମାନ’ ପାଇଁ ସର୍ବଦା ଲଢ଼େଇ ଜାରି ରଖିଛି। ଓଜେସି ଏକମାତ୍ର ଦଳ ଭାବେ ଚାଷୀମାନଙ୍କ ପାଇଁ ସଦାସର୍ବଦା ସ୍ୱର ଉତ୍ତୋଳନ କରୁଅଛି । ଚାଷୀଙ୍କ ସ୍ୱାର୍ଥ ପାଇଁ ବିଗତ ଦଶନ୍ଧିରେ କୌଣସି ପ୍ରମୁଖ ଦଳ ଆନ୍ତରିକତା ସହ କାର୍ଯ୍ୟ କରୁନାହାନ୍ତି, ତାହା ଓଜେସିର ମୁଖ୍ୟ ମୁଦ୍ଦା ହୋଇଛି । ଓଜେସିରେ କୃଷକ ନେତାମାନେ ସାମିଲ ହେବାପରେ ଏହି ସ୍ୱର ଆହୁରି ଶାଣିତ ହେବ । ଚାଷୀଙ୍କ ପାଇଁ ଲଢ଼ିବୁ, ଚାଷୀଙ୍କୁ ନେଇ ବଢ଼ିବୁ ବୋଲି ସେ ନିଜ ବକ୍ତବ୍ୟ ରଖିଥିଲେ । ଓଜେସିରେ ସାମିଲ ହେବା ଅବସରରେ କୃଷକ ନେତା ଶେଷଦେବ ନନ୍ଦ କହିଥିଲେ ଯେ, ଓଡ଼ିଶାରେ ଆଉଏକ ଶକ୍ତିଶାଳୀ ଆଞ୍ଚଳିକ ଦଳର ଆବଶ୍ୟକତା ଅଛି ବୋଲି ୩୮ ପ୍ରତିଶତ ଜନତା ଚାହୁଁଥିବା ଏକ ସର୍ଭେ ରିପୋର୍ଟରେ ପ୍ରକାଶ ପାଇଛି । ସେହି ଆବଶ୍ୟକତାକୁ ପୂରଣ କରିବା ପାଇଁ ଚାଷୀମାନଙ୍କ ଦାବିକୁ ଓଜେସି ପ୍ରମୁଖ ପ୍ରସଙ୍ଗ କରିବ ବୋଲି କହିବା ପରେ ଓଜେସି ନେତୃତ୍ୱ ସହ ଆଲୋଚନା ହୋଇ ଓଜେସିରେ ସାମିଲ ହୋଇଛୁ । ମହମ୍ମଦ ମୋକିମଙ୍କ “ଓଡ଼ିଆଙ୍କ ପାଇଁ ଓଡ଼ିଶା” ଆହ୍ୱାନରେ ଆମେ ପ୍ରଭାବିତ ହୋଇ ଓଜେସିରେ ସାମିଲ ହେବା ନିଷ୍ପତ୍ତି ନେଲୁ । କୃଷକମାନେ ସାରା ରାଜ୍ୟରେ ଓଜେସିର ବଳ ବଢ଼ାଇବେ ଓ ଓଜେସି ଚାଷୀ ପ୍ରସଙ୍ଗକୁ ସର୍ବାଗ୍ରେ ରଖିବ । କୃଷକ ସଂଗଠନର କର୍ମକର୍ତ୍ତାମାନେ ରାଜ୍ୟରେ ଓଜେସିକୁ ଏକ ପ୍ରମୁଖ ଦଳ ଭାବେ ଗଢ଼ି ତୋଳିବାରେ ସମସ୍ତ ଶକ୍ତି ଲଗାଇବେ ବୋଲି ଶ୍ରୀ ନନ୍ଦ କହିଥିଲେ । ଅନ୍ୟ ଦୁଇ ସହ-ସଂଯୋଜକ ଉମାକାନ୍ତ ଭାରତ ଓ ନିମାଇଁ ରାୟ କହିଥିଲେ ଯେ, ଚାଷୀଙ୍କ ଗୁରୁତ୍ୱପୂର୍ଣ୍ଣ ସମସ୍ୟା ସମୟରେ ଅଣକୃଷି ପ୍ରସଙ୍ଗରେ ନବନିର୍ମାଣ କୃଷକ ସଂଗଠନ ଆନ୍ଦୋଳନ କରୁଥିବାରୁ ଆମେ ସଂଗଠନର ହାତ ଛାଡ଼ିଲୁ । ବିନା ରାଜନୀତିରେ ଚାଷୀମାନଙ୍କ ଦାବି ହାସଲ ସମ୍ଭବ ହେଉନଥିବାରୁ ରାଜନୈତିକ ବିକଳ୍ପ ଚିନ୍ତା କରି ଏବଂ ଚାଷୀମାନଙ୍କ ସ୍ୱାର୍ଥ ନିମନ୍ତେ ମହମ୍ମଦ ମୋକିମଙ୍କ ନେତୃତ୍ୱରେ ଓଜେସିର ଚାଷୀ ପ୍ରସଙ୍ଗକୁ ପ୍ରମୁଖ ମୁଦ୍ଦା କରିବାରେ ପ୍ରଭାବିତ ହୋଇ ଓଜେସିରେ ସାମିଲ ହେଲୁ ।

ଆଜିର ଏହି ମିଶ୍ରଣ ପର୍ବରେ ନବନିର୍ମାଣ କୃଷକ ସଂଗଠନର କଟକ ଜିଲ୍ଲା ସଂଯୋଜକ କୃଷ୍ଣ ବେହେରା, ରାଜ୍ୟ କାର୍ଯ୍ୟକାରିଣୀ ସଭ୍ୟ ଦେବୀପ୍ରସାଦ ମହାରଣା, ନୟାଗଡ଼ ଜିଲ୍ଲା ସଂଯୋଜକ ପ୍ରଶନ୍ନ ପ୍ରଧାନ, ନୟାଗଡ଼ କେନ୍ଦ୍ର ସମବାୟ ବ୍ୟାଙ୍କର ପୂର୍ବତନ ସଭାପତି ମହେଶ୍ୱର ଜେନା, ଅଭିମନ୍ୟୁ ଗୁମାନସିଂ, କେନ୍ଦୁଝର ଜିଲ୍ଲାର କୃଷକ ନେତା ଶ୍ୟାମସୁନ୍ଦର ମହାନ୍ତ, ରାଜକିଶୋର ମହାନ୍ତି, ହରିଶ୍ଚନ୍ଦ୍ର ଦଳାଇ, ଦୁର୍ଯ୍ୟୋଧନ ମହାନ୍ତ, ଅଜୟ ନାୟକ, ଯାଜପୁର ଜିଲ୍ଲାର କୃଷକ ନେତା ବଲ୍ଲଭ ଜେନା, ମାଧବାନନ୍ଦ ଶାନ୍ତି, ଦିଲ୍ଲୀପ କୁମାର ବେହେରା, ରବୀନ୍ଦ୍ର ବରାଡ, ମଧୁସ୍ମିତା ମହାନ୍ତ ଓ ଅମରେନ୍ଦ୍ର ନାୟକ ପ୍ରମୁଖ ଓଜେସିରେ ସାମିଲ ହୋଇଥିଲେ ।

ଅନ୍ୟମାନଙ୍କ ମଧ୍ୟରେ ଓଜେସି ଉପସଭାପତି ବଦ୍ରୀ ନାରାୟଣ ମହାନ୍ତି, ନିକୁଞ୍ଜ ପଶାୟତ, ପ୍ରଦୀପ ପ୍ରଧାନ, ମିଡିଆ ସେଲ୍ ଅଧ୍ୟକ୍ଷ ପ୍ରଶାନ୍ତ ଶତପଥୀ, ସେବା ସଂଗଠନ ଅଧ୍ୟକ୍ଷ ମନୋଜ ଜେନା, ଯୁବ ଜନତା କଂଗ୍ରେସ ସଭାପତି ଆର୍ଯ୍ୟବୀର ଲେଙ୍କା, ପ୍ରଶନ୍ନ ବିଷୋୟୀ ଓ ସୁଜିତ ସ୍ୱାଇଁ ପ୍ରମୁଖ ଉପସ୍ଥିତ ରହି କୃଷକନେତା ମାନଙ୍କୁ ଓଜେସିକୁ ସ୍ୱାଗତ କରିଥିଲେ ।