ଟିପିଡ଼ବ୍ଲ୍ୟୁଓଡିଏଲ ର ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ ଚିତ୍ତରଞ୍ଜନ ବେହୁରା ଲାଞ୍ଚ ମାମଲାରେ ଦୋଷୀ ସାବ୍ୟସ୍ତ

ସୁବର୍ଣ୍ଣପୁର,— ବର୍ତ୍ତମାନ ରାଉରକେଲା ସର୍କଲ ଅନ୍ତର୍ଗତ ଟିପିଡ଼ବ୍ଲ୍ୟୁଓଡିଏଲ ର ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ ତଥା ବିନିକା ବିଦ୍ୟୁତ ବିଭାଗ ପୂର୍ବତନ କନିଷ୍ଠ ଯନ୍ତ୍ରୀ ଚିତ୍ତରଞ୍ଜନ ବେହୁରା ଲାଞ୍ଚ ମାମଲାରେ ଦୋଷୀ ସାବ୍ୟସ୍ତ ହୋଇ ଜେଲ ଯାଇଥିବା ଜଣାଯାଇଛି। ଦୁର୍ନୀତି ବିରୋଧୀ ଅଭିଯାନରେ ଏକ ଗୁରୁତ୍ୱପୂର୍ଣ୍ଣ ଘଟଣାକ୍ରମରେ ଓଡ଼ିଶା ଭିଜିଲାନ୍ସ ବିଭାଗ ଟିପିଡ଼ବ୍ଲ୍ୟୁଓଡିଏଲ ର ରାଉରକେଲା ସର୍କଲ ଅଧୀନସ୍ଥ ଜଣେ ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀଙ୍କୁ ଏକ ଲାଞ୍ଚ ମାମଲାରେ ଦୋଷୀ ସାବ୍ୟସ୍ତ କରାଇବାରେ ସଫଳ ହୋଇଛି। ଚିତ୍ତରଞ୍ଜନ ବେହୁରା ଯିଏ ପୂର୍ବରୁ ସୁବର୍ଣ୍ଣପୁର ଜିଲ୍ଲା ବିନିକା ସ୍ଥିତ ବିଦ୍ୟୁତ ବିଭାଗରେ କନିଷ୍ଠ ଯନ୍ତ୍ରୀ ଥିଲେ ଏବଂ ବର୍ତ୍ତମାନ ଟିପିଡ଼ବ୍ଲ୍ୟୁଓଡିଏଲ ର ରାଉରକେଲା ସର୍କଲରେ ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ ଭାବେ କାର୍ଯ୍ୟରତ ଅଛନ୍ତି। ତାଙ୍କୁ ବଲାଙ୍ଗୀର ସ୍ଥିତ ସ୍ୱତନ୍ତ୍ର ଭିଜିଲାନ୍ସ ବିଚାରପତି ଦୋଷୀ ସାବ୍ୟସ୍ତ କରିଛନ୍ତି। ତାଙ୍କ ବିରୋଧରେ ଓଡ଼ିଶା ଭିଜିଲାନ୍ସ ପକ୍ଷରୁ ‘ପିସି ଆକ୍ଟ, ୧୯୮୮ ର ଧାରା ୧୩(୨) ସହ ପଠିତ ଧାରା ୧୩(୧)(ଡି)/୭ ଅଧୀନରେ ଚାର୍ଜସିଟ୍ ଦାଖଲ କରାଯାଇଥିଲା। ଅଭିଯୋଗ ଅନୁଯାୟୀ, ସେ ‘ଜଳନିଧି ଯୋଜନା’ର ଜଣେ ହିତାଧିକାରୀଙ୍କ ଠାରୁ ୮,୦୦୦ ଟଙ୍କା ଲାଞ୍ଚ ଦାବି କରି ଲାଞ୍ଚ ଗ୍ରହଣ କରିଥିଲେ। ହିତାଧିକାରୀଙ୍କ ଚାଷ ଜମିରେ ଲାଗିଥିବା ମୋଟର ପମ୍ପ ପାଇଁ ସେ ଅସ୍ଥାୟୀ ବିଲ୍ ବଦଳରେ ନିୟମିତ ବିଦ୍ୟୁତ୍ ବିଲ୍ ଯୋଗାଇ ଦେବା ପାଇଁ ଏହି ଲାଞ୍ଚ ନେଇଥିଲେ। ଏହି ମାମଲାରେ ତାଙ୍କୁ ୪ ବର୍ଷର ସଶ୍ରମ କାରାଦଣ୍ଡ ଏବଂ ଜରିମାନା ଦଣ୍ଡାଦେଶ ଦିଆଯାଇଛି।ଏହା ବ୍ୟତୀତ, ଦୋଷୀ ସାବ୍ୟସ୍ତ ହୋଇଥିବା ଚିତ୍ତରଞ୍ଜନ ବେହୁରାଙ୍କୁ ଦଣ୍ଡ ଭୋଗିବା ପାଇଁ ଜେଲକୁ ପଠାଇ ଦିଆଯାଇଛି। ଦୋଷୀ ସାବ୍ୟସ୍ତ ହେବା ପରେ, ଚିତ୍ତରଞ୍ଜନ ବେହୁରାଙ୍କୁ ଚାକିରିରୁ ବରଖାସ୍ତ କରିବା ପାଇଁ ଓଡ଼ିଶା ଭିଜିଲାନ୍ସ ବିଭାଗ ଏବେ ସକ୍ଷମ କର୍ତ୍ତୃପକ୍ଷଙ୍କ ନିକଟରେ ଆବେଦନ କରିବ ବୋଲି ଜଣାଯାଇଛି l

ସୁବର୍ଣ୍ଣପୁର ରୁ ଉଗ୍ରସେନ କର୍ମୀ ଙ୍କ ରିପୋର୍ଟ ଇପିଏ ନ୍ୟୁଜ…