ରଥଯାତ୍ରା-୨୦୨୬: ପୁରୀ ମହାନଗର ନିଗମ ପକ୍ଷରୁ ସୁନିଶ୍ଚିତ ହେଉଛି ନିରବଚ୍ଛିନ୍ନ ନାଗରିକ ସେବା

ସ୍ୱଚ୍ଛତାର ନିରବ ସାଧକ; ଶ୍ରୀକ୍ଷେତ୍ରକୁ ପ୍ରତି ମୁହୂର୍ତ୍ତରେ ସ୍ୱଚ୍ଛ ରଖୁଛନ୍ତି ସଫେଇ କର୍ମଚାରୀ*

ପୁରୀ,: ‘ସ୍ୱଚ୍ଛତା ହିଁ ସେବା’ ଅଭିଯାନର ଆଭିମୁଖ୍ୟକୁ ଆଧାର କରି ବିଶ୍ୱପ୍ରସିଦ୍ଧ ରଥଯାତ୍ରାରେ ସାମିଲ ହେଉଥିବା ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସ୍ୱାଗତ ପାଇଁ ପବିତ୍ର ଶ୍ରୀକ୍ଷେତ୍ରରେ ଏକ ବୃହତ୍ ନାଗରିକ ସେବା ଅଭିଯାନ ଜାରି ରହିଛି। ଏହି ବ୍ୟାପକ ସ୍ୱଚ୍ଛତା ଅଭିଯାନର ପ୍ରକୃତ କର୍ଣ୍ଣଧାର ହେଉଛନ୍ତି ହଜାର ହଜାର ଉତ୍ସର୍ଗୀକୃତ ସଫେଇ କର୍ମଚାରୀ, ଯେଉଁମାନେ ସହରକୁ ନିର୍ମଳ ରଖିବା ପାଇଁ କ୍ଷେତ୍ର ସ୍ତରରେ ୨୪ ଘଣ୍ଟା ନିରନ୍ତର ଶ୍ରମଦାନ କରୁଛନ୍ତି। ମୌସୁମୀ ବର୍ଷା ଭଳି ପ୍ରତିକୂଳ ପରିସ୍ଥିତି ସତ୍ତ୍ୱେ ଭକ୍ତମାନଙ୍କୁ ଏକ ସ୍ୱଚ୍ଛ, ସୁରକ୍ଷିତ ଏବଂ ଆରାମଦାୟକ ଅନୁଭୂତି ପ୍ରଦାନ କରିବା ନିମନ୍ତେ ପୁରୀ ମହାନଗର ନିଗମ (ପିଏମସି) ପକ୍ଷରୁ ଏକ ବୃହତ୍ତମ ନାଗରିକ ସେବା ନିୟୋଜନ କରାଯାଇଛି। ଜିଲ୍ଲା ପ୍ରଶାସନ, ପୋଲିସ, ଅଗ୍ନିଶମ ସେବା ଏବଂ ଅନ୍ୟାନ୍ୟ ସଂପୃକ୍ତ ବିଭାଗ ସହିତ ଉତ୍କୃଷ୍ଟ ସୁସମନ୍ୱୟ ରକ୍ଷା କରି ପୌରପାଳିକା ପକ୍ଷରୁ ସହରର ବିଭିନ୍ନ ଭାଗରେ ବ୍ୟାପକ ମାନବ ସମ୍ବଳ, ଯନ୍ତ୍ରପାତି ଓ ଭିତ୍ତିଭୂମି ନିୟୋଜିତ କରାଯାଇଛି।

ଏହି ଅଭିଯାନରେ ସ୍ୱଚ୍ଛତାକୁ ସର୍ବାଧିକ ପ୍ରାଥମିକତା ଦିଆଯାଇ ପବିତ୍ର ରୀତିନୀତି ପାଇଁ ବଡ଼ଦାଣ୍ଡ ଓ ଗୁଣ୍ଡିଚା ମନ୍ଦିର ପରିସରରେ ବ୍ୟାପକ ରାତ୍ରିକାଳୀନ ସଫେଇ କାର୍ଯ୍ୟକ୍ରମ କରାଯାଉଛି। ସହରରେ ଦିନସାରା ବିଭିନ୍ନ ସ୍ଥାନରେ ଖାଦ୍ୟ ବଣ୍ଟନ ଜାରି ରହିଥିବା ବେଳେ ବର୍ଜ୍ୟବସ୍ତୁର ତୁରନ୍ତ ନିଷ୍କାସନ ଓ ଆବର୍ଜନା ଜମା ନହେବା ପାଇଁ ବଡ଼ଦାଣ୍ଡ, ରଥର ଆଭ୍ୟନ୍ତରୀଣ ସ୍ଥଳ, ମନ୍ଦିର ପରିସର, ବେଳାଭୂମି ରାସ୍ତା ତଥା ଅଧିକ ଜନଗହଳି ପୂର୍ଣ୍ଣ ଅଞ୍ଚଳରେ ବିଶେଷ ସଫେଇ ଦଳ ସହ ଆବର୍ଜନା ସଂଗ୍ରହ ଗାଡ଼ିଗୁଡ଼ିକୁ ନିରନ୍ତର ମୁତୟନ କରାଯାଇଛି। ରଥଯାତ୍ରା ଲାଗି ପୌରପାଳିକା ପକ୍ଷରୁ ହାତକୁ ନିଆଯାଇଥିବା ଏହି ବୃହତ୍ତମ ସଫେଇ ଅଭିଯାନରେ ୧,୪୫୧ ଜଣ ସଫେଇ କର୍ମଚାରୀ, ୫୭୦ଟି ଆବର୍ଜନା ସଂଗ୍ରହ ଗାଡ଼ି, ୧୫ଟି ସେସପୁଲ୍ ଗାଡ଼ି ଏବଂ ୩ଟି ମେକାନିକାଲ୍ ରୋଡ୍ ସ୍ୱିପିଂ ମେସିନ୍ ନିୟୋଜିତ ହୋଇଛି, ଯାହାଦ୍ୱାରା ଅବିରତ ସଫେଇ ଓ ବର୍ଜ୍ୟବସ୍ତୁର ବୈଜ୍ଞାନିକ ପଦ୍ଧତିରେ ନିଷ୍କାସନ ସୁନିଶ୍ଚିତ କରାଯାଇପାରୁଛି।
ବର୍ଷାର ମୁକାବିଲା ନିମନ୍ତେ ମହାନଗର ନିଗମ ପକ୍ଷରୁ ୨୩ଟି ନିର୍ଦ୍ଧାରିତ ପାର୍କିଂ ସ୍ଥଳରେ ରକ୍ଷଣାବେକ୍ଷଣ ଦଳ ସହ ଜରୁରୀକାଳୀନ ମରାମତି ପାଇଁ ବଫର୍ ନିର୍ମାଣ ସାମଗ୍ରୀ ପ୍ରସ୍ତୁତ ରଖାଯାଇଛି, ଯାହାଦ୍ୱାରା ଯଥାଶୀଘ୍ର ପୁନରୁଦ୍ଧାର ସମ୍ଭବ ହେଉଛି। ଜଳବନ୍ଦୀ ପ୍ରବଣ ଅଞ୍ଚଳରୁ ତୁରନ୍ତ ଜଳ ନିଷ୍କାସନ ଏବଂ ଭକ୍ତଙ୍କ ଅବାଧ ଯାତାୟାତ ପାଇଁ ମହାନଗର ନିଗମ ୩୮ଟି ଡିୱାଟରିଂ ପମ୍ପ, ଅଗ୍ନିଶମ ସେବା ବିଭାଗର ୫୦ଟି ଅତିରିକ୍ତ ପମ୍ପ ଏବଂ ମିନିଟ୍ ପ୍ରତି ପ୍ରାୟ ୩,୦୦୦ ଲିଟର ଜଳ ନିଷ୍କାସନ କ୍ଷମତା ସମ୍ପନ୍ନ ୧୦ଟି ଉଚ୍ଚ କ୍ଷମତା ସମ୍ପନ୍ନ ପମ୍ପ ସେଟ୍ କାର୍ଯ୍ୟ କରୁଛି।
ଶ୍ରଦ୍ଧାଳୁଙ୍କ ସୁବିଧା ପାଇଁ ପୋଲିସ ଆକମୋଡେସନ କ୍ୟାମ୍ପ, ପାର୍କିଂ ସ୍ଥଳ ଓ ଜନଗହଳିପୂର୍ଣ୍ଣ ଅଞ୍ଚଳରେ ପ୍ରାୟ ୧,୬୦୦ଟି ଅସ୍ଥାୟୀ ଓ ମୋବାଇଲ ଶୌଚାଳୟ (FRP ୟୁନିଟ୍, ମୋବାଇଲ୍ ଟଏଲେଟ୍ ଭ୍ୟାନ୍, ୟୁରିନାଲ୍ ଏବଂ ଦିବ୍ୟାଙ୍ଗ ଅନୁକୂଳ ସୁବିଧା ସହ) ସ୍ଥାପନ କରାଯାଇଛି। ସ୍ୱଚ୍ଛତା ଓ ଉତ୍ତରଦାୟିତ୍ୱ ରକ୍ଷା କରିବା ପାଇଁ ପ୍ରତି କ୍ଲଷ୍ଟରକୁ ଜିଓ-ଟ୍ୟାଗିଂ (Geo-tagging) କରାଯାଇ ଉତ୍ସର୍ଗୀକୃତ ସଫେଇ କର୍ମଚାରୀଙ୍କ ଦ୍ୱାରା ୨୪ ଘଣ୍ଟା ରକ୍ଷଣାବେକ୍ଷଣ କରାଯାଉଛି। ଏହା ସହିତ ନିରାପଦ ଯାତାୟାତ ପାଇଁ ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନରେ ପ୍ରାୟ ୩,୦୦୦ଟି ଅସ୍ଥାୟୀ ଆଲୋକ ବ୍ୟବସ୍ଥା କରାଯାଇଛି ଏବଂ କୌଣସି ଯାନ୍ତ୍ରିକ ତ୍ରୁଟିର ତୁରନ୍ତ ନିରାକରଣ ପାଇଁ ମେଣ୍ଟେନାନ୍ସ ଟିମ୍ ସର୍ବଦା ପ୍ରସ୍ତୁତ ରହିଛନ୍ତି।
ରାଜ୍ୟ ଗୃହନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଡା. କୃଷ୍ଣଚନ୍ଦ୍ର ମହାପାତ୍ର ଏହି ବ୍ୟାପକ ସେବା ବ୍ୟବସ୍ଥାର ପ୍ରଶଂସା କରି କହିଛନ୍ତି ଯେ, ମହାପ୍ରଭୁ ଶ୍ରୀଜଗନ୍ନାଥଙ୍କ ଭକ୍ତମାନଙ୍କୁ ବିଶ୍ୱସ୍ତରୀୟ ନାଗରିକ ସେବା ଯୋଗାଇଦେବା ରାଜ୍ୟ ସରକାରଙ୍କ ସର୍ବୋଚ୍ଚ ପ୍ରାଥମିକତା। ପ୍ରବଳ ବର୍ଷା ସତ୍ତ୍ୱେ ଆନ୍ତଃ-ବିଭାଗୀୟ ସୁସମନ୍ୱୟ ଯୋଗୁଁ ସ୍ୱଚ୍ଛତା ବଜାୟ ରଖିବା, ଜଳବନ୍ଦୀ ସମସ୍ୟାର ସମାଧାନ ଏବଂ ସାଧାରଣ ସୁବିଧା ସୁଯୋଗର ସୁପରିଚାଳନା କରାଯାଇପାରିଛି, ଯାହା ଶ୍ରଦ୍ଧାଳୁଙ୍କ ପାଇଁ ଏକ ଆଧ୍ୟାତ୍ମିକ ଦୃଷ୍ଟିରୁ ସମୃଦ୍ଧ, ସ୍ୱଚ୍ଛ ଓ ଶୃଙ୍ଖଳିତ ପରିବେଶ ସୁନିଶ୍ଚିତ କରିଛି।
ସହର ସାରା ପଥଚାରୀ ଏବଂ ଯାନବାହନ ଚଳାଚଳକୁ ସୁଗମ କରିବା ପାଇଁ ମୁଖ୍ୟ ରାସ୍ତାଗୁଡ଼ିକରୁ କ୍ରମାଗତ ଭାବେ ଜବରଦଖଲ ଉଚ୍ଛେଦ କରାଯାଉଛି। ଉତ୍ସବ ପୂର୍ବ ପ୍ରସ୍ତୁତି ସ୍ୱରୂପ ସହରର ୩୦୦ରୁ ଅଧିକ ମୁଖ୍ୟ ନାଳର ସଫେଇ କରାଯିବା ସହ ୩ ଫୁଟରୁ ଅଧିକ ଗଭୀର ଥିବା ସମସ୍ତ ନାଳକୁ କଂକ୍ରିଟ୍ ସ୍ଲାବ୍ ଦ୍ୱାରା ଆବୃତ କରାଯାଇଛି ଏବଂ ଶ୍ରଦ୍ଧାଳୁଙ୍କ ନିରାପଦ ଓ ଅବାଧ ଯାତାୟାତ ପାଇଁ ରାସ୍ତାର ସମସ୍ତ ଖାଲଖମା ମରାମତି କାର୍ଯ୍ୟ ରଥଯାତ୍ରା ପୂର୍ବରୁ ସମ୍ପୂର୍ଣ୍ଣ କରାଯାଇଥିଲା।

ପ୍ରଶାସନିକ ଦକ୍ଷତା ସମ୍ପର୍କରେ ସୂଚନା ଦେଇ ଗୃହନିର୍ମାଣ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଉଷା ପାଢ଼ୀ କହିଛନ୍ତି ଯେ, ଚଳିତ ବର୍ଷ ନାଗରିକ ସେବା ପ୍ରଦାନ ପ୍ରକ୍ରିୟାକୁ ଅତ୍ୟନ୍ତ ସୁସଂଗଠିତ, ପ୍ରଯୁକ୍ତିଭିତ୍ତିକ ଓ ଉତ୍ତରଦାୟୀ କରାଯାଇଛି। ସ୍ୱଚ୍ଛତା ଭିତ୍ତିଭୂମି ପାଇଁ ଜିଓ-ଟ୍ୟାଗିଂର ବ୍ୟବହାର, ନିରନ୍ତର କ୍ଷେତ୍ର ପରିଦର୍ଶନ ଏବଂ ସଫେଇ କର୍ମଚାରୀ ଓ ପ୍ରଶାସନିକ ଅଧିକାରୀଙ୍କ ୨୪ ଘଣ୍ଟା ନିୟୋଜନ ଯୋଗୁଁ ସମଗ୍ର ପୁରୀ ସହରରେ ସ୍ୱଚ୍ଛତାର ଉଚ୍ଚ ମାନଦଣ୍ଡ ଓ ଦକ୍ଷ ସେବା ପ୍ରଦାନ ସୁନିଶ୍ଚିତ ହୋଇପାରିଛି।
ସୁଚିନ୍ତିତ ଯୋଜନା, ବ୍ୟାପକ ସମ୍ବଳ ନିୟୋଜନ ଏବଂ ବିଭିନ୍ନ ସରକାରୀ ସଂସ୍ଥାର ମିଳିତ ସହଯୋଗ ବଳରେ ପୁରୀ ମହାନଗର ନିଗମ ବିଶ୍ୱର ଏହି ବୃହତ୍ତମ ଧାର୍ମିକ ସମାବେଶରେ ଉଚ୍ଚକୋଟୀର ନାଗରିକ ଶାସନ ପ୍ରତିବଦ୍ଧତାକୁ ପୁନଃ ପ୍ରତିପାଦିତ କରିଛି। ସଫେଇ କର୍ମଚାରୀ, ଯନ୍ତ୍ରୀ, ସମ୍ମୁଖ ଭାଗର କର୍ମଚାରୀ, କ୍ଷେତ୍ର ଅଧିକାରୀ ଏବଂ ସହଯୋଗୀ ସଂସ୍ଥାଗୁଡ଼ିକର ଅକ୍ଳାନ୍ତ ପରିଶ୍ରମ ଯୋଗୁଁ ଏକ ସ୍ୱଚ୍ଛ, ସୁରକ୍ଷିତ ଓ ସୁପରିଚାଳିତ ରଥଯାତ୍ରା ସମ୍ଭବ ହୋଇଛି, ଯାହା ଲକ୍ଷ ଲକ୍ଷ ଭକ୍ତଙ୍କୁ ଏକ ସ୍ୱାସ୍ଥ୍ୟକର, ଶୃଙ୍ଖଳିତ ଏବଂ ଆଧ୍ୟାତ୍ମିକ ପରିବେଶରେ ଭାଗ ନେବାର ସୁଯୋଗ ପ୍ରଦାନ କରିଛି।