ରୁଷୁଡ଼ା ଫାଣ୍ଡି ଅଧିକାରୀ ଭାବେ ଏସ୍ଆଇ ପ୍ରମୋଦ ସାହୁଙ୍କ ଯୋଗଦାନ ନେଇ ପ୍ରଶ୍ନ
ବରଗଡ଼: ବରଗଡ଼ ଜିଲ୍ଲାର ଭେଡେନ ଥାନା ଅଧୀନସ୍ଥ ରୁଷୁଡ଼ା ଫାଣ୍ଡିର ଫାଣ୍ଡି ଅଧିକାରୀ ଭାବେ ସୋହେଲା ଥାନାରେ କାର୍ଯ୍ୟରତ ସବ୍-ଇନ୍ସପେକ୍ଟର ଶ୍ରୀ ପ୍ରମୋଦ ସାହୁଙ୍କୁ ଯୋଗଦାନ କରାଇବା ସକାଶେ ଆଦେଶ ଜାରି ହୋଇଥିବା ଜଣାପଡ଼ିଛି। ଏହା ସମ୍ପର୍କରେ ବରଗଡ଼ ଜିଲ୍ଲା ଆରକ୍ଷୀ ଅଧୀକ୍ଷକଙ୍କ ଡ୍ରାଫ୍ଟ ଡି.ଓ. ନଂ-୧୦୮୩, ତାରିଖ ୧୪.୦୭.୨୦୨୬ ମଧ୍ୟ ମିଳିଥିବା କୁହାଯାଉଛି।
ତେବେ ଆଦେଶ ଜାରି ହେବାର ଦୀର୍ଘ ସମୟ ବିତିଯାଇଥିଲେ ମଧ୍ୟ ଶ୍ରୀ ସାହୁଙ୍କୁ ତାଙ୍କ ନୂତନ କାର୍ଯ୍ୟସ୍ଥଳରେ ଯୋଗଦାନ କରାଇବା ପାଇଁ ସୋହେଲା ଥାନା ପକ୍ଷରୁ ଆବଶ୍ୟକ ସୁପାରିଶ ପତ୍ର ଏପର୍ଯ୍ୟନ୍ତ ପ୍ରଦାନ କରାଯାଇନଥିବା ଅଭିଯୋଗ ଉଠିଛି। ଫଳରେ ଏହି ପ୍ରଶାସନିକ ବିଳମ୍ବକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିବା ସହ ଚର୍ଚ୍ଚା ଜୋର ଧରିଛି।
ସରକାରୀ ବିଭାଗରେ ଜଣେ କର୍ମଚାରୀଙ୍କ ବଦଳି, ନିଯୁକ୍ତି କିମ୍ବା ନୂତନ ଦାୟିତ୍ୱ ସମ୍ପର୍କିତ ଆଦେଶ ପରେ ନିର୍ଦ୍ଧାରିତ ପ୍ରକ୍ରିୟାରେ ତାଙ୍କୁ ନୂତନ ସ୍ଥାନରେ ଯୋଗଦାନ କରାଇବା ଏକ ନିୟମିତ ପ୍ରଶାସନିକ ପଦକ୍ଷେପ। ଏପରି ସ୍ଥିତିରେ ଆଦେଶ ଜାରି ହୋଇଥିବା ସତ୍ତ୍ୱେ ଯଦି ଆବଶ୍ୟକ ପ୍ରକ୍ରିୟା ବିଳମ୍ବିତ ହୁଏ, ତେବେ ତାହାର କାରଣ ସ୍ପଷ୍ଟ କରିବା ଜରୁରୀ ବୋଲି ମତ ପ୍ରକାଶ ପାଉଛି।
ରୁଷୁଡ଼ା ଫାଣ୍ଡିରେ ନୂତନ ଫାଣ୍ଡି ଅଧିକାରୀଙ୍କ ଯୋଗଦାନ ସମ୍ପର୍କିତ ଆଦେଶ ଥିବା ବେଳେ ଏହା କାର୍ଯ୍ୟକାରୀ ହେବାରେ ବିଳମ୍ବ କାହିଁକି ଘଟୁଛି, ସୋହେଲା ଥାନା ପକ୍ଷରୁ ସୁପାରିଶ ପତ୍ର ଜାରି କରିବାରେ କେଉଁ ପ୍ରଶାସନିକ କାରଣ ବାଧକ ସାଜିଛି ଏବଂ ଏହାର ସମାଧାନ କେବେ ହେବ—ଏସବୁ ପ୍ରଶ୍ନ ଏବେ ସାଧାରଣରେ ଆଲୋଚନାର ବିଷୟ ହୋଇଛି।
ଏହି ପ୍ରସଙ୍ଗରେ ଜିଲ୍ଲା ପୁଲିସ ପ୍ରଶାସନ ପକ୍ଷରୁ ତଥ୍ୟାଧାରିତ ସ୍ପଷ୍ଟୀକରଣ ଦେଇ ଶୀଘ୍ର ଆବଶ୍ୟକ ପଦକ୍ଷେପ ନିଆଯିବାକୁ ଦାବି ହେଉଛି। ପ୍ରଶାସନିକ ଆଦେଶର ନିର୍ଦ୍ଦିଷ୍ଟ ସମୟରେ କାର୍ଯ୍ୟାନ୍ୱୟନ ହେଲେ ଏହି ଅନିଶ୍ଚିତତାର ଅବସାନ ଘଟିବା ସହ ରୁଷୁଡ଼ା ଫାଣ୍ଡିର କାର୍ଯ୍ୟକଳାପ ମଧ୍ୟ ଅଧିକ ସୁସଂଗଠିତ ହୋଇପାରିବ।
ଇପିଏରୁ ଜିଲ୍ଲା ପ୍ରତିନିଧି କ୍ଷମାନିଧି ବଣ୍ଡୁକିଙ୍କ ରିପୋର୍ଟ,
