ପ୍ରାଥମିକ ଶିକ୍ଷକ ଶିକ୍ଷୟିତ୍ରୀଙ୍କ ମଧ୍ୟରେ ଅଶାନ୍ତି
ବରିଷ୍ଠ ପ୍ରାଥମିକ ଶିକ୍ଷକଙ୍କ କ୍ଷୋଭ ଓ ନ୍ୟାୟର ଆହ୍ବାନ ଶିକ୍ଷା ହେଉଛି ସମାଜର ମେରୁଦଣ୍ଡ, ,ସେହି ମେରୁଦଣ୍ଡକୁ ସୁଦୃଢ଼ କରିବାରେ ଯେଉଁ ଗୁରୁମାନେ ଆପଣା ଜୀବନର ସୁନେଲି ଦଶକଗୁଡ଼ିକୁ ନିଶ୍ଚିହ୍ନ ଭାବେ ଉତ୍ସର୍ଗ କରିଦେଇଛନ୍ତି, ଆଜି ସେମାନଙ୍କର ଅସ୍ତିତ୍ୱ ଓ ସ୍ୱାଭିମାନ ପ୍ରଶ୍ନବାଚୀ ଘେରରେ। ନବରଙ୍ଗପୁରର ମାଟିରେ ଆଜି ସୃଷ୍ଟି ହୋଇଛି ଏକ ବିଷାଦମୟ ଗୁଞ୍ଜରଣ—”ଯେଉଁ ହାତ ଦୀର୍ଘ ୨୫ ରୁ ୩୯ ବର୍ଷ ଧରି କଳାପଟାରେ ଆଲୋକର ବର୍ଣ୍ଣମାଳା ଆଙ୍କିଆସିଛି, ସେହି ହାତକୁ ଆଜି ପଦୋନ୍ନତିରୁ ବଞ୍ଚିତ କରିବା ପଛରେ କେଉଁ ଅଦୃଶ୍ୟ ଆଇନର ବିଧାନ ରହିଛି?”
ଅତୀତର ଆଲେଖ୍ୟ ଓ ଆଇନର ଜଟିଳତାଇତିହାସର ପୃଷ୍ଠା ଓଲଟାଇଲେ ଦେଖାଯାଏ, ୨୦୦୧ ମସିହାରେ ଭାରତବର୍ଷରେ ଶିକ୍ଷାକୁ ମୌଳିକ ଅଧିକାର ଭାବେ ସ୍ୱୀକୃତି ମିଳିବା ପରେ, ୨୦୧୧ ମସିହାରେ ଓଡ଼ିଶା ରାଜ୍ୟ ସରକାର ଏହାକୁ କାର୍ଯ୍ୟକାରୀ କରିଥିଲେ। ୨୦୧୨ର ନୂତନ ନିଯୁକ୍ତି ବିଜ୍ଞାପନରେ ଶିକ୍ଷକ ଯୋଗ୍ୟତା ପରୀକ୍ଷା (OTET) ର କଠୋର ପ୍ରାଚୀର ଠିଆ କରାଗଲା। କିନ୍ତୁ ଆଇନର ଗାମ୍ଭୀର୍ଯ୍ୟ ଓ ୨୦୧୯ ଓଡ଼ିଶା ରାଜପତ୍ର (Gazette Notification) ର ସ୍ପଷ୍ଟ ସ୍ୱୀକୃତି କହେ—୨୦୧୧ ଫେବୃଆରୀ ପୂର୍ବରୁ ନିଯୁକ୍ତ ବରିଷ୍ଠ ଶିକ୍ଷକମାନଙ୍କ କ୍ଷେତ୍ରରେ ଏହି ନିୟମ ଅପ୍ରାସଙ୍ଗିକ। ୨୦୧୧ ରୁ ୨୦୧୯ ଏବଂ ତା’ପରଠାରୁ ଆଜି ପର୍ଯ୍ୟନ୍ତ ସରକାରୀ ସ୍ତରରେ କୌଣସି ସ୍ପଷ୍ଟ ନିର୍ଦ୍ଦେଶନାମା ପ୍ରକାଶ ନପାଇବା ସତ୍ତ୍ୱେ, ଆଜି ହଠାତ୍ ଜୀବନସାୟାହ୍ନରେ ପହଞ୍ଚିଥିବା ଗୁରୁଜନଙ୍କୁ ପଦୋନ୍ନତିରୁ ବଞ୍ଚିତ କରିବା ଓ ଚାକିରିରୁ ଅବସୃତ କରିବାର ଅଭିସନ୍ଧି ଶିକ୍ଷକ ସମାଜକୁ ଆଘାତ ଦେଇଛି।
ମୁଖରେ କଳାକନା, ଚେତନାରେ ଜାଗରଣଏହି ଅନ୍ୟାୟ ବିରୋଧରେ ନିଖିଳ ଉତ୍କଳ ପ୍ରାଥମିକ ଶିକ୍ଷକ ଫେଡେରେସନ୍ର ସଭାପତି ଶ୍ରୀଯୁକ୍ତ ରମଣୀ ରଞ୍ଜନ ତ୍ରିପାଠୀଙ୍କ ନେତୃତ୍ୱରେ ଜାଗିଉଠିଛନ୍ତି ଶତାଧିକ ପ୍ରାଥମିକ ଶିକ୍ଷକ ଶିକ୍ଷୟିତ୍ରୀ ଶାନ୍ତ ସରଳ ରେ ଦୃଢ଼ ପ୍ରତିବାଦର ପ୍ରତୀକ ସ୍ୱରୂପ ମୁଖରେ କଳାକନା ଆବୃତ କରି ଶିକ୍ଷାୟତନର ଶିଳ୍ପୀମାନେ ରାଜପଥକୁ ଓହ୍ଲାଇଥିଲେ। ପ୍ରତିବାଦ ଶୋଭାଯାତ୍ରା ଶେଷରେ ଜିଲ୍ଲା ଶିକ୍ଷା ଅଧିକାରୀଙ୍କ ମାଧ୍ୟମରେ ରାଜ୍ୟ ଶିକ୍ଷା ନିର୍ଦ୍ଦେଶକଙ୍କୁ ଆକୁଳ ଦାବିପତ୍ର ପ୍ରେରଣ କରାଯାଇଛି।ନ୍ୟାୟର ଆହ୍ବାନଶିକ୍ଷକ ନେତାଙ୍କ ସ୍ୱରରେ ଥିଲା ଅସହାୟତାର ମିଶ୍ରିତ କାନ୍ଦ—”ମାନ୍ୟବର ସୁପ୍ରିମକୋର୍ଟ ୨୦୨୮ ଅଗଷ୍ଟ ପର୍ଯ୍ୟନ୍ତ ସମୟସୀମା ଧାର୍ଯ୍ୟ କରିଥିବା ବେଳେ, ବରିଷ୍ଠ ଶିକ୍ଷକଙ୍କ ସତ୍ୟପାଠକୁ ସ୍ୱୀକାର କରି ସେମାନଙ୍କୁ ସମ୍ମାନର ସହ ପଦୋନ୍ନତି ପ୍ରଦାନ କରାଯାଉ। ନଚେତ୍ ଏହି ସଂଗ୍ରାମର ନିଆଁ ଆଗାମୀ ଦିନରେ ଅଧିକ ତୀବ୍ର ଓ ବ୍ୟାପକ ରୂପ ଧାରଣ କରିବ।”
