ଖୁଜେନପାଲି ବିଦ୍ୟାଳୟରେ ମାରୱାଡ଼ି ମହିଳା ସମିତି, ଲାୟନ୍ସ କ୍ଲବ ଓ ସହଯୋଗ ଫାଉଣ୍ଡେସନର ମିଳିତ ବୃକ୍ଷରୋପଣ ଅଭିଯାନ
ବଲାଙ୍ଗୀର, ପରିବେଶ ସୁରକ୍ଷା ଏବଂ ସବୁଜ ଭବିଷ୍ୟତ ଗଠନର ଉଦ୍ଦେଶ୍ୟରେ ବଲାଙ୍ଗୀରସ୍ଥିତ ଖୁଜେନପାଲି ବିଦ୍ୟାଳୟ ରେ ମାରୱାଡ଼ି ମହିଳା ସମିତି, ବଲାଙ୍ଗୀର,ଲାୟନ୍ସ କ୍ଲବ, ବଲାଙ୍ଗୀର ଓ *ସହଯୋଗ ଫାଉଣ୍ଡେସନ*ର ମିଳିତ ଆନୁକୂଳ୍ୟରେ ଏକ ଭବ୍ୟ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ଏହି କାର୍ଯ୍ୟକ୍ରମରେ ବିଦ୍ୟାଳୟର ଛାତ୍ରଛାତ୍ରୀ, ଶିକ୍ଷକ-ଶିକ୍ଷୟିତ୍ରୀ, କର୍ମଚାରୀଙ୍କ ସହ ତିନୋଟି ସଂସ୍ଥାର ପଦାଧିକାରୀ ଓ ସଦସ୍ୟମାନେ ଉତ୍ସାହର ସହିତ ଅଂଶଗ୍ରହଣ କରିଥିଲେ।କାର୍ଯ୍ୟକ୍ରମର ଶୁଭାରମ୍ଭ ଅତିଥିମାନଙ୍କ ଦ୍ୱାରା ବୃକ୍ଷରୋପଣ କରାଯିବା ସହ ହୋଇଥିଲା। ଏହି ଅବସରରେ ବିଭିନ୍ନ ପ୍ରଜାତିର ଫଳଜ, ଛାୟାଦାର ଓ ଔଷଧୀୟ ଚାରା ରୋପଣ କରାଯାଇଥିଲା। ବକ୍ତାମାନେ କହିଥିଲେ ଯେ, ପରିବେଶ ସୁରକ୍ଷା ବର୍ତ୍ତମାନ ସମୟର ସବୁଠାରୁ ବଡ଼ ଆବଶ୍ୟକତା।
ପ୍ରତ୍ୟେକ ନାଗରିକ କେବଳ ଗଛ ଲଗାଇବା ନୁହେଁ, ବରଂ ସେଗୁଡ଼ିକର ଯତ୍ନ ନେବା ପାଇଁ ମଧ୍ୟ ସଂକଳ୍ପବଦ୍ଧ ହେବା ଉଚିତ।ମାରୱାଡ଼ି ମହିଳା ସମିତି, ଲାୟନ୍ସ କ୍ଲବ ଓ ସହଯୋଗ ଫାଉଣ୍ଡେସନର ପ୍ରତିନିଧିମାନେ କହିଥିଲେ ଯେ, ବୃକ୍ଷ ପୃଥିବୀର ଅମୂଲ୍ୟ ସମ୍ପଦ। ବିଦ୍ୟାଳୟଗୁଡ଼ିକରେ ଏଭଳି କାର୍ଯ୍ୟକ୍ରମ ଆୟୋଜନ ଦ୍ୱାରା ଛାତ୍ରଛାତ୍ରୀଙ୍କ ମନରେ ପ୍ରକୃତି ପ୍ରତି ଭଲପାଇବା, ସାମାଜିକ ଦାୟିତ୍ୱବୋଧ ଏବଂ ପରିବେଶ ସଚେତନତା ବୃଦ୍ଧି ପାଇଥାଏ।ବିଦ୍ୟାଳୟର ପ୍ରଧାନଶିକ୍ଷକ ଓ ଶିକ୍ଷକମାନେ ସମସ୍ତ ସଂସ୍ଥାକୁ କୃତଜ୍ଞତା ଜଣାଇ କହିଥିଲେ ଯେ, ଏଭଳି କାର୍ଯ୍ୟକ୍ରମ ଛାତ୍ରଛାତ୍ରୀଙ୍କୁ ପରିବେଶ ସୁରକ୍ଷା ପ୍ରତି ପ୍ରେରିତ କରିଥାଏ। ଶେଷରେ ଉପସ୍ଥିତ ସମସ୍ତେ ଅଧିକରୁ ଅଧିକ ବୃକ୍ଷରୋପଣ କରିବା ସହ ସେଗୁଡ଼ିକର ନିୟମିତ ଯତ୍ନ ନେବା ପାଇଁ ସଂକଳ୍ପ ନେଇଥିଲେ। ଏହି ମିଳିତ ବୃକ୍ଷରୋପଣ ଅଭିଯାନ ଏକ ସବୁଜ ଓ ସ୍ୱଚ୍ଛ ସମାଜ ଗଠନ ଦିଗରେ ପ୍ରଶଂସନୀୟ ପଦକ୍ଷେପ ବୋଲି ସମସ୍ତେ ମତ ପ୍ରକାଶ କରିଥିଲେ।
