ବେଆଇନ ବାଣ ବ୍ୟବସାୟ ଉପରେ ପୁରୀ ପୋଲିସର ବଡ଼ ପ୍ରହାର: ୧୮ଟି ମାମଲା, ୫୦ ଲକ୍ଷ ଟଙ୍କାର ସାମଗ୍ରୀ ଜବତ

ଜନସାଧାରଣଙ୍କ ଜୀବନ ଓ ସମ୍ପତ୍ତିର ସୁରକ୍ଷା ସୁନିଶ୍ଚିତ କରିବା, ବେଆଇନ ବାଣ ପ୍ରସ୍ତୁତି, ଗଚ୍ଛିତକରଣ ଓ ବିକ୍ରୟ ଉପରେ ରୋକ୍ ଲଗାଇବା ଏବଂ ଅଗ୍ନିକାଣ୍ଡ ଓ ବିସ୍ଫୋରଣଜନିତ ଦୁର୍ଘଟଣାକୁ ପ୍ରତିହତ କରି ଏକ ସୁରକ୍ଷିତ, ଶାନ୍ତିପୂର୍ଣ୍ଣ ଓ ଦୁର୍ଘଟଣାମୁକ୍ତ ଉତ୍ସବ ପାଳନ ସୁନିଶ୍ଚିତ କରିବା ପାଇଁ ପୁରୀ ଜିଲ୍ଲା ପୋଲିସ ପକ୍ଷରୁ ଜିଲ୍ଲାବ୍ୟାପୀ ସ୍ୱତନ୍ତ୍ର ଅଭିଯାନ ଜାରି ରହିଛି।

ପୁରୀ ଜିଲ୍ଲାର ବିଭିନ୍ନ ଥାନା ଅଞ୍ଚଳରେ ଏହି ସ୍ୱତନ୍ତ୍ର ଅଭିଯାନ ଅନ୍ତର୍ଗତ ଚଢ଼ାଉ କରାଯାଇ ମୋଟ ୧୮ଟି ମାମଲା ରୁଜୁ କରାଯାଇଛି। ଏହି ଚଢ଼ାଉ ସମୟରେ ପ୍ରାୟ ୫୦ ଲକ୍ଷ ଟଙ୍କା ମୂଲ୍ୟର ବିଭିନ୍ନ ପ୍ରକାରର ବାଣ ଏବଂ ବାଣ ପ୍ରସ୍ତୁତିରେ ବ୍ୟବହୃତ ବିସ୍ଫୋରକ ସାମଗ୍ରୀ ଜବତ କରାଯାଇଛି।

ଜବତ ସାମଗ୍ରୀ ମଧ୍ୟରେ ବିଭିନ୍ନ ପ୍ରକାରର ଫୁଟା ବାଣ, ଆତସବାଜି, ଏବଂ ବାଣ ତିଆରିରେ ବ୍ୟବହୃତ ବିଭିନ୍ନ ବିପଦପୂର୍ଣ୍ଣ ରାସାୟନିକ ଓ ବିସ୍ଫୋରକ ଉପାଦାନ ରହିଛି।

ଏହି ସମସ୍ତ ଘଟଣାରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଆଇନ ଅନୁଯାୟୀ ଆବଶ୍ୟକ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଜନସାଧାରଣଙ୍କ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦେଇ ଏଭଳି ବେଆଇନ କାର୍ଯ୍ୟକଳାପ ବିରୋଧରେ ପୋଲିସର ଚଢ଼ାଉ ଓ ଯାଞ୍ଚ ଅଭିଯାନ ଆଗକୁ ମଧ୍ୟ ଜାରି ରହିବ।

⚠️ ଜନସାଧାରଣଙ୍କ ପାଇଁ ସତର୍କତା ଓ ନିବେଦନ
୧. ବିନା ଅନୁମତିରେ ବାଣ ପ୍ରସ୍ତୁତି, ଗଚ୍ଛିତ ରଖିବା କିମ୍ବା ବିକ୍ରୟ କରନ୍ତୁ ନାହିଁ।
୨. ବେଆଇନ ଭାବେ ବିସ୍ଫୋରକ ସାମଗ୍ରୀ ଗଚ୍ଛିତ ରଖିବା ଓ ବାଣ ତିଆରି କରିବାଠାରୁ ଦୂରେଇ ରୁହନ୍ତୁ।
୩. କେବଳ ଅନୁମୋଦିତ ଓ ଲାଇସେନ୍ସପ୍ରାପ୍ତ ବିକ୍ରେତାଙ୍କଠାରୁ ନିରାପଦ ଓ ଅନୁମୋଦିତ ବାଣ କିଣନ୍ତୁ।
୪. ବାଣ ଫୁଟାଇବା ସମୟରେ ଶିଶୁମାନଙ୍କ ପ୍ରତି ବିଶେଷ ଧ୍ୟାନ ଦିଅନ୍ତୁ ଏବଂ ସମସ୍ତ ସୁରକ୍ଷା ନିୟମ ପାଳନ କରନ୍ତୁ।
୫. କୌଣସି ସ୍ଥାନରେ ବେଆଇନ ବାଣ ପ୍ରସ୍ତୁତି, ଗଚ୍ଛିତ କରିବା କିମ୍ବା ବିକ୍ରୟ ସମ୍ପର୍କରେ ସୂଚନା ମିଳିଲେ ତୁରନ୍ତ ନିକଟସ୍ଥ ଥାନାକୁ ଜଣାନ୍ତୁ।

ପୁରୀ ପୋଲିସର ନିବେଦନ: ଆପଣଙ୍କ ସୁରକ୍ଷା ଆମର ପ୍ରାଥମିକତା। ଆସନ୍ତୁ, ଏକ ସୁରକ୍ଷିତ ଓ ଦୁର୍ଘଟଣାମୁକ୍ତ ଉତ୍ସବ ପାଳନ କରିବା